Búgin - Mıǵraj túni

Bul týraly ummet.kz jazady.

Hıjrattan bir jarym jyl buryn erejep aıynyń jıyrma jetinshi túninde Paıǵambarymyz Muhammedke (s.ǵ.s.) Mıǵraj muǵjızasy berildi. Alla Taǵalanyń qudyretimen, qalaýymen ǵana bolatyn keremetterdi - «muǵjıza» dep ataıdy. Adamzatqa eki dúnıede shapaǵatshy paıǵambarymyz Muhammedke (s.ǵ.s.) teńdessiz ǵajaıyp muǵjızalar berildi. Onyń bastysy - Quran. Odan keıingisi - Isra jáne Mıǵraj muǵjızasy.

Paıǵambarymyzǵa (s.ǵ.s.) mıǵrajda úsh úlken syılyq berildi:

Birinshisi, bes ýaqyt namaz.

Ekinshisi, Allaǵa serik qospaǵan jannyń jánnatqa kiretini jaıyndaǵy súıinshi habar.

Úshinshisi, Baqara súresiniń sońǵy eki aıaty.

Isra jáne Mıǵraj oqıǵasy mıládı 621 jyly erejep aıynyń 26-synan 27-sine óter túnde, dúısenbide, Mekkeden Medınege hıjrat etýden 18 aı buryn boldy. Keıinirek jyl saıyn bul túndi shyn ıman-yqylas jáne qosymsha nápil ǵıbadattarmen atap ótkizý musylmandar úshin dástúrge aınaldy. Mıǵraj túninde paıǵambarymyz hazireti Muhammed (s.ǵ.s.) Mekkedegi ál-Haram meshitinen Quddystaǵy (Ierýsalım) ál-Aqsa meshitine bir sátte Isra jasady (túngi sapar arabtarda «ısra» dep atalady).

Odan mıǵrajǵa - jeti qat kókke kóterilip, dúnıeden ótken barlyq paıǵambarlarmen kezdesti, únemi qulshylyqta júretin perishtelermen jolyqty. Qudiretti Jaratýshymyzdyń túrli belgi - aıattaryn kórip, Onymen tildesti. Bes ýaqyt namaz osy túnde paryz etildi. Mıǵraj - paıǵambarymyz Muhammedtiń (s.ǵ.s.) eń úlken muǵjızalarynyń biri. Muǵjıza - Allanyń qudiretimen júzege asatyn, adamdardan tek paıǵambarlarǵa ǵana tán, tańǵajaıyp qubylys. Júreginde ıman nury ornyqqan árbir adam Allanyń muǵjızalaryna shúbásiz senedi.