Búgin men úshin qos mereke – Konstıtýtsııa kúni dúnıege kelgen órt sóndirýshi

ÓSKEMEN. QazAqparat – Shyǵys Qazaqstan oblysynda Konstıtýtsııa kúninde týǵan úsh TJD qyzmetkeri bar, dep habarlaıdy QazAqparat tilshisi.

Óskemendegi №4 órt sóndirý bóliminiń jas júrgizýshisi Ádil Muratuly úshin búgin qos mereke. Sebebi ol Konstıtýtsııa qabyldanǵan kúni jaryq dúnıe esigin ashqan.

«Ata Zańymyzdyń qabyldanýy halqymyzdyń quqyqtaryn bekitti. Bul kúni týǵanymdy maqtan tutamyn. Men órt sóndirýshi mamandyǵyn tańdadym. Sebebi qutqarýshylar óz ómirlerin qaterge tigip, basqa adamdarǵa kómekke umtylady», - deıdi ol.

Ondaǵan órtterdi sóndirgen Dıdar Áshimhan Shemonaıha qalasyndaǵy №27 órt sóndirý bóliminde ter tógip júr. Ol da Konstıtýtsııa kúninde dúnıege kelgen.

«Elimizde ózimiz qalaǵan bilimdi alyp, súıikti salańa bet burýǵa barlyq múmkindik jasalǵan. Ózim osy mamandyqty tańdaǵanyma ókinbeımin. Barsha qazaqstandyqtardy Konstıtýtsııa kúnimen shyn júrekten quttyqtaımyn!», - deıdi Dıdar Áshimhan.

Onyń áıeli Nazym da tótenshe jaǵdaılar júıesinde ınjener bolyp jumys isteıdi.

Al Shyńǵys Smaǵulov oblysta óziniń erligimen talaı tanylǵan. Ótken jyly ol balkonnan qulaıyn dep turǵan áıeldi qutqardy.

«Ata Zańnyń arqasynda elde tynyshtyq, bereke-birlik saqtalady. Zańdy buzbaı, durys júrý árqaısymyzǵa baılanysty. Biz jastar memleketimizdiń bolashaǵy úshin eńbektenip, onyń damýy men órkendeýi úshin atsalysýym qajet», - deıdi Shyńǵys.