Búgin - Medeý muz aıdyny paıdalanýǵa berilgen kún
ASTANA. QazAqparat - 1972 jyly 28 jeltoqsanda «Medeý» muz aıdyny resmı túrde paıdalanýǵa berildi. Teńiz deńgeıinen 1,691 metr bıikte ornalasqan «Medeý» muz aıdyny» - Almaty qalasynyń maqtanyshyna aınalǵan jáne qala turǵyndarynyń súıikti oryndarynyń biri. Onyń aýmaǵy 10500 sharshy metr jerdi alyp jatyr jáne 10500 kórermendi syıǵyzady. Álemdegi 120-dan asa úzdik sporttyq rekord «Medeý» muz aıdynynda ornatylǵan.
«Medeý» ataýy HІH ǵasyrdyń sońynda ómir súrgen qoǵam qaıratkeri, qazaq halqyn kóshpeli otyryqshylyqqa beıimdeý jumystarymen aınalysqan, qazaq balalaryna arnap pansıonat ashqan Medeý Pusyrmanovtyń qurmetine berilgen. «Medeýdiń» aınalasyn 21 myń gektar orman-toǵaı alqaby qorshap jatyr. Onda qaıyń, kókterek, qaraǵaı men shyrsha, dolana, sheten aǵashtary ósedi. Muz aıdynynan bólek, munda Ǵarysh sáýleleri ǵylymı stantsııasy, Úlken Almaty kóli, Joǵarǵy Gorelnık sarqyramasy, Almatyny selden qorǵap turatyn bógetter, Terrenkýr jáne segiz júzden astam satysy bar baspaldaq bar.
29 qańtar men 8 aqpan aralyǵynda Almatyda ótetin 2017 jylǵy 28-shi Dúnıejúzilik qysqy Ýnıversıada saıystarynyń bir bóligi Medeý muz aıdynynda ótedi.
