Búgin - Máýlit án-Nábı - Paıǵambarymyz Muhammedtiń (s.ǵ.s.) týǵan kúni
ASTANA. Aqpannyń 25-i. QazAqparat - Paıǵambarymyz hazireti Muhammed (s.ǵ.s) dúnıege kelgen Máýlit kúni bıyl aqpannyń 25-ine sáıkes keledi.
Bul mereke Rábıýl-Áýýal aıynyń 12-shi kúninde atap ótiledi. ıAǵnı, 15 aqpan men 15 naýryz aralyǵy Rábıýl - áýýal aıy.
Máýlit - arab sózi, qazaqsha "týylǵan kún" degen maǵyna beredi. Bul ataý Allah taǵalanyń eń súıiktisi pendesi, Adamnyń (ǵ.s.) Isa (ǵ.s.) paıǵambarǵa deıingi Alla taǵala elshileriniń sońǵysy Muhammedtiń (s.ǵ.s.) dúnıege kelýiniń qurmetine ol aıǵa osy ataý berilgen.
Ol quraıysh taıpasynan, onyń ishindegi Banı Hashım áýletinen shyqqan. Týylǵan jeri - Mekke qalasy. Ákesiniń aty Abdýlla, anasynyń esimi Ámına. Paıǵambarymyz ata-anadan jalǵyz. Óıtkeni, ákesi perzenti dúnıege kelmeı turǵanda dúnıe salǵan. Anasynan 6 jasynda aırylǵan. Muhammed (s.ǵ.s) Isadan (ǵ.s) mıladı jyl sanaýy boıynsha, 571 jyl keıin, 20 sáýirde, Hıjra sanaýy boıynsha Rabıýl-áýýal aıynyń 12-si kúni dúnıege kelgen.
Barlyq maqtaý-madaqtaý, «Máýlit oqý» Paıǵambarymyz Muhammedke arnalǵan. Qazir máýlit Qazaqstan musylmandar dinı basqarmasynyń uıymdastyrýymen búkil elimizde toılanýda. Máýlit áýeli meshitterde oqylady, sonan soń kópshiliktiń qatysýymen aýdandyq, oblystyq, respýblıkalyq deńgeıde atap ótiledi. Qasıetti máýlit týra bir aıǵa sozylady.
