Búgin Máskeýde -Aza tutý kúni
STANA. Naýryzdyń 30-y. QazAqparat - Reseı elordasynda búgin - Aza tutý kúni. Máskeýlikter men barsha reseılikter dúısenbi kúni elordalyq metronyń «Lýbıanka» jáne «Mádenıet saıabaǵy» stansylarynda lańkestik áreketterdiń saldarynan qaza bolǵandardy eske alady.
Qalada memlekettik jalaýlar men Máskeý qalasynyń jalaýlary túsirildi, oıyn-saýyq sharalary toqtatyldy, Telearnalar da óz efırlerinen oıyn-saýyq baǵdarlamalaryn alyp tastaýda, dep habarlaıdy «Maıak» radıostansysy.
Kesheden bastap máskeýlikter men qala qonaqtary atalǵan eki stansyǵa gúl shoqtaryn ákelýde, balaýyz shamdar jaǵýda. Dúısenbi kúni tańerteń oryn alǵan lańkestik shabýyl, sońǵy málimetter boıynsha 38 adamnyń ómirin qıǵan. Keshe Dmıtrıı Medvedev te «Lýbıanka» stansysyndaǵy qaıǵyly oqıǵa bolǵan jerge baryp, gúl shoǵyn qoıdy. Reseı Prezıdenti jarylysty uıymdastyrýshylardyń tabylatynyn jáne kózderi joıylatynyn málim etti.
Qazir Máskeý aýrýhanalarynda 72 jaraly adam jatyr. Densaýlyq saqtaý vedomstvosynyń aqparaty boıynsha, olardyń kóbisiniń jaǵdaıy aýyr. Aýrýhanalar qan donorlaryna qatty muqtaj ekenderin málim etýde.
