Búgin mánerlep syrǵanaýdan Qazaqstan chempıonatynyń jabylý rásimi ótedi - Astana
ASTANA. 17 jeltoqsan. QazAqparat /Gúlnár Jandaǵulova/ - Juma kúni Astanada respýblıkalyq velotrekte eresekter men jastardyń arasynda mánerlep syrǵanaýdan Qazaqstan Respýblıkasy chempıonatynyń resmı jabylý rásimi ótedi.
Chempıonatqa Astana, Almaty qalalarynan, Qaraǵandy, Batys Qazaqstan, Almaty jáne Pavlodar oblystarynan kelgen komandalar qatysýda. Jarystyń aıasynda respýblıkalyq velotrekte 2011 jylǵy Azıadanyń testilik jarystary ótedi. Bul shara tehnıkalyq qyzmetterdiń, tóreshiler korpýsynyń, eriktiler men basqa da mamandardyń aldaǵy Azıada baǵdarlamasyna daıyndyqtaryn tekserýge múmkindik beredi. Tóreshiler brıgadasyna 6 halyqaralyq jáne 12 ulttyq tóreshi kirip otyr.
Atalmysh sport kesheninde velotrek, 25 metrlik basseın, sport túrlerine arnalǵan ámbebap zal, fıtnes-klýb, 100 oryndyq qonaqúı bar. 2009 jyly velotrek jobasyna muz aıdyny qosyldy, Azıada oıyndary kezinde osy aıdynda short-trekten jáne mánerlep syrǵanaýdan jarystar ótkeli otyr.
