Búgin Londonǵa sportshylarymyzdyń alǵashqy legi attandy
ASTANA. QazAqparat - Jeńil atletıkadan 4-13 tamyz aralyǵynda ótetin álem chempıonatyna qatysý úshin Qazaqstannan alǵashqy delegatsııa búgin Almaty áýejaıynan Londonǵa attandy, dep habarlaıdy QazAqparat tilshisi.
Qazaqstan jeńil atletıka federatsııasynyń resmı saıty taratqan málimetke súıensek, alǵashqy attanǵandardyń qatarynda 2017 jylǵy Azııanyń úsh dúrkin chempıony, sprınter Vıktorııa Zıabkına (Almaty) sporttyq júristen otbasylyq jup Georgıı Sheıko men Polına Repına bar. Olarmen birge jeńil atletıkadan Qazaqstan ulttyq quramasynyń bas bapkeri Georgıı Egorov pen federatsııanyń sporttyq dırektory Aleksandr Koşeev te Londonǵa jol tartty.
Bul sportshylarymyzdyń ishinde Vıktorııa Zıabkına álem chempıonatyna alǵash bolyp qatysqaly otyr. Ol 8 tamyzda 200 metrge júgiredi. Al Georgıı Sheıko men Polına Repına 13 tamyzda óner kórsetedi.
