Búgin Qyzylordada «Donor» aktsııasyna oraı 44 adam qan tapsyrdy
QYZYLORDA. 26 maýsym. QazAqparat - Qyzylorda oblystyq Tótenshe jaǵdaılar departamentinde maýsymnyń 20-ynan bastap júrip jatqan «Búgin sen kómektesesiń - erteń saǵan kómektesedi!» atty qan berý aktsııasy barǵan saıyn óz qatysýshylary qataryn kóbeıtip keledi.
Bul týraly departament baspasóz qyzmeti habarlady.
«Donor» - latynnyń «syılaý» degen sózinen alynǵan úǵym. Osy tusta donor bolý nemese qan berý gýmanıstik jáne adamgershiliktiń bir kórinisi bolyp tabylady. Elimizde jáne onyń ishinde Qyzylorda qalasynda kún ótken saıyn barsha naýqastardy qanmen qamtý múmkindigi jetkiliksiz bolyp otyr. Donorlyq adam qanyn adamǵa quıý arqyly sol adamnyń ómirin arashalap qalý nemese tóngen qaýpin azaıtý úshin jasalady. Osyǵan sáıkes Qyzylorda oblysy TJD mamandary, qutqarýshylary men órt sóndirýshileri qan berýdi jyl saıyn daǵdyǵa aınaldyryp keledi. Birneshe kún boıy oblystyq qan quıý ortalyǵynyń mamandary mekemege kelip, qutqarýshylardyń qan quramy men jaramdylyǵyn anyqtaı kele, qan alý aktsııasyn jalǵastyrýda.
Qutqarýshylar árbir qoǵam múshesi densaýlyǵy jarap turǵan sátte qan berýge mindetti dep túsinedi. «Búgin sen kómektesseń - erteńgi kúni saǵan da bireý kómektesýi múmkin».
Búgingi kúni 44 adam osy baǵytta qan berdi. Aktsııa áli de jalǵasýda. Aldyn ala boljam boıynsha 100 lıtrdeı qan Qyzylorda oblysy qan bankisine toltyrylady dep kútilýde.
