Búgin Qyzylordada 300 páterdi quraıtyn 5 kóp qabatty turǵyn úıdiń irgetasy qalandy
QYZYLORDA. QazAqparat - Oblys ortalyǵyndaǵy «SPMK-70» móltek aýdanynda irgesi qalanǵan 5 kópqabatty turǵyn úı «Óńirlerdi damytýdyń 2020 jylǵa deıingi baǵdarlamasy» aıasynda salynatyn bolady. 20,5 myń sharshy metrdi quraıtyn jańa úılerdiń qurylysy «Báıterek development» AQ arqyly júzege asyrylady.
Turǵyn úılerdiń irgetasyn qalaý rásimine oblys ákimi Qyrymbek Kósherbaev qatysyp, qurylysshylarmen kezdesti.
Jobanyń jalpy quny - 2 mlrd. 970,7 mln. teńge. Merdiger mekeme kóppáterli turǵyn úılerdi 2016 jyldyń qarasha aıynda paıdalanýǵa beremiz dep otyr.
2015 jyly 53 kópqabatty úı qurylysy bastalyp 42 úı paıdalanýǵa berilgen bolatyn. Osylaısha turǵyn úı kólemi 2014 jylǵa qaraǵanda oblysta 3,5 esege, al Qyzylorda qalasynda 8 esege artty. Tek qana oblys ortalyǵynda páterdiń kezegi bir jylda 17% -ǵa qysqardy.
Bıyl da osy qarqyndy saqtap qalý úshin «Qazaqstannyń ıpotekalyq kompanııasy», «Samuryq-Qazyna» jyljymaıtyn múlik qory jáne «Turǵyn úı qurylys jınaq bankimen» tyǵyz jumys jasalýda. 2016 jyly 3170 páterdi quraıtyn 70-ke jýyq kópqabatty turǵyn úı salynady.
