Búgin - Qyrǵyzstanda prezıdent saılaýy aldyndaǵy tynyshtyq kúni
BІShKEK. Kabar-QazAqparat - Qyrǵyzstanda kezekten tys prezıdent saılaýy men referendým aldyndaǵy tynyshtyq kúni bastaldy, dep habarlaıdy QazAqparat Kabar agenttigine silteme jasap.
Osylaısha kandıdattardyń saılaýaldy úgit-nasıhaty toqtady. Tynyshtyq kúni saılaýshylar úmitkerlerdiń baǵdarlamasyna taǵy bir kóz júgirtip, taldap, óz tańdaýyn jasaıdy.
Sonymen qatar Ortalyq saılaý komıssııasy akkredıttegen buqaralyq aqparat quraldary men ınternet basylymdar da úgit-nasıhat júrgize almaıdy.
Tynyshtyq kúniniń talabyn buzǵandardy OSK jaýapkershilikke tartýy múmkin.
Qyrǵyzstanda kezekten tys prezıdent saılaýy men referendým 2021 jylǵy 10 qańtarda ótedi. OSK málimetinshe, saılaýda 3 mln 563 myń 574 saılaýshy daýys bere alady.
Prezıdenttikke 17 úmitker talasyp otyr. Munyń aldynda olardyń sany 18 edi, alaıda Rashıd Taǵaev atty kandıdat saılaýǵa qatysýdan bas tartty. Onyń esimi bıýlletennen syzylyp tastalady.
Referendýmda mynadaı basqarý formasyn tańdaý múmkindigi beriledi:
— prezıdenttik respýblıka
— parlamenttik respýblıka
— eki nusqaǵa da qarsymyn.
Saılaýshylarǵa eki bıýlletennen beriledi. Aq tústi bıýlleten - prezıdent saılaýyna, kók tústi - referendýmǵa.
