Búgin qutqarý qyzmetterine 4 myńnan astam qońyraý túsken

ASTANA. QazAqparat - QR ІІM Tótenshe jaǵdaılar komıteti eldegi boranǵa baılanysty júrgizilip jatqan jumystar jaıynda esep berdi, dep habarlaıdy «QazAqparat» HAA tilshisi, vedomstvonyń resmı ókili Rýslan Imanqulovqa silteme jasap.

Astanadaǵy «Nursultan Nazarbaev» áýejaıynda tańerteńgi 7-den bastap barlyq áýe reısteri toqtatyldy. Saǵat 01.00-den barlyq baǵyttar boıynsha barlyq kólik túrleri qozǵalysyna shekteý qoıyldy.

«112» pýltine  2000-ǵa jýyq qońyraý kelip tústi, olardyń kóbi aqparattyq syńaıdaǵy qońyraýlar. Zardap shekkender joq.

Aqmola oblysynda tańerteńgi 8-30-dan bastap, barlyq kólik túrleri boıynsha, barlyq baǵyttarǵa jol jabyldy.

Qutqarý qyzmetine 1180 qońyraý túsken. Zardap shekkender týraly aqparat joq. Arshaly, Astrahan, Ereımentaý, Tselınograd, Shortandy aýdandary mańaıynda 100-den astam kóliktiń jınalyp qalǵany baıqaldy.

Qaraǵandy oblysynda saǵat tańǵy 8-den barlyq kólik túrleri boıynsha, barlyq baǵyttarǵa jol jabyldy. «112» nómirine 1300-den astam qońyraý tústi. Ulytaý, Abaı, Shet aýdandarynda apattyq-qutqarý is-sharalary júrgizilip jatyr.

Sondaı-aq, búgin saǵat 10:30-dan bastap aýa raıynyń nasharlaýyna baılanysty  «Qyzylorda-Pavlodar-Ýspenka-RF shekarasyna deıin» respýblıkalyq mańyzdaǵy avtojolynyń ýchaskesinde (12-216 shaqyrym aralyǵy, Qyzylorda qalasy- Qaraǵandy oblysynyń shekarasy) barlyq kólik túrleri úshin qozǵalys toqtatyldy.