Búgin - kúlli musylman qaýymy úshin Qasıetti Baraat túni
ASTANA. QazAqparat - Musylmandyq meıramdardyń kúntizbesine sáıkes 21 mamyrdan 22-sine qaraǵan tún Kúnádan tazarý túni - Baraat.
Paıǵambarymyz (s.a.ý.) bir hadıste: «Shaǵban - meniń aıym, Erejep - Allanyń aıy, Ramazan - úmbetimniń aıy», - dep osy aıǵa da basa nazar aýdarǵan. Hadısterde Alla elshisi (s.a.ý.) Ramazan aıynan keıin eń kóp osy aıda oraza ustaıtyndyǵy aıtylady.
Baraat túni - Shaǵban aıynyń on besinshi túni. Bul túnde adamnyń bir jyldaǵy rızyq, baı nemese kedeı, joǵary nemese tómen bolatynynan, ǵumyrlarynyń uzarýy nemese ajalynyń kelýi jaıly habarlardy Allanyń ámirimen perishtelerdiń daıyndaıtyndyǵy keıbir derekterde bildirilgen.
Bul tún - keshirim túni dep te atalady. Óıtkeni, osy túnde Alla kóp adamnyń kúnásin keshirmek. Paıǵambarymyz (s.a.ý.) Baraat túnin ǵıbadat etip ótkizgen.
Baraat túniniń ereksheliginiń biri - sol kúni qubylanyń Qýdýs meshitinen, Qaǵbaǵa qaraı ózgerýi. Bul túni «jaqsylyq namazy» oqylady.
Endeshe osy túndi qulshylyqpen ótkizý duǵalardyń qabyl bolýyna sebep.
