Búgin QR Ulttyq muraǵatynyń kórme zalynda jazýshy, fılologııa ǵylymynyń doktory, professor Aqseleý Seıdimbektiń qujattyq jeke qorynyń ashylý rásimi ótedi
ASTANA Sáýirdiń 8-i. QazAqparat - Búgin Mádenıet jáne aqparat mınıstrligi Aqparat jáne muraǵat komıteti QR Ulttyq muraǵatynyń kórme zalynda belgili ǵalym, jazýshy, Qazaqstannyń eńbek sińirgen qaıratkeri, fılologııa ǵylymynyń doktory, professor Aqseleý Seıdimbektiń qujattyq jeke qorynyń ashylý rásimi ótkiziledi.
Bul týraly atalǵan muraǵattyń baspasóz qyzmetinen habarlady.
Sharaa barysynda qazaq rýhanııatynyń kórnekti tulǵasy Aqseleý Slanulynyń jeke qorynan alynǵan qujattar negizinde kórme uıymdastyrylady.
Kórmedegi qujattar qor ıesiniń shyǵarmashylyq baǵyttaryna baılanysty «Arman qanatynda», «Armanyn bilimmen bekemdegen», «Qarymdy qalamger», «Ǵalym-etnograf», «Biligine bilimi jarasqan», «Óresi bıik óner ıesi», «Hattar syr shertedi», «Tuǵyry bıik tulǵa» bólimderden turady. Sondaı-aq qalamgerdiń baspasóz betterinde jaryq kórgen maqalalarynyń, kitaptarynyń, povest, ocherk, áńgimeleriniń qoljazbalary jáne eńbekteriniń óz qolymen túzetilgen mashınkalyq nusqalary, fotoqujattary, elektrondyq jetkizgishtegi qujattar, qurmet gramotalary, alǵyshattar, ártúrli ǵylymı ataqtaryn, qyzmet laýazymdaryn rastaıtyn kýálikteriniń túpnusqalary qoıylǵan. Onyń ishinde «Alpamys batyr», «Kúńgir-kúńgir kúmbezder», «Kenish», «Oıtolǵaq», «Kúı shejire», «Beıpil sózder», «Qazaqtyń qysqasha tarıhy» atty kitaptaryn, «Taýǵa bitken jalbyz», «Qandy qyrǵyn», «Tabysý», «Sulý sóz, shuraıly oı», «Óresi bıik óner» sekildi áńgimelerin, «Uly júz», «Orta júz», «Kishi júz», «Qazaq, úsh júz, uran, tańba» týraly shejirelik ańyzdaryn, «Han Abylaı» tolyqmetrajdy tarıhı fılmin, «Kúnniń qyzy Kúnikeı», «Qozy Kórpesh - Baıan sulý» t.b. stsenarıılerin ataǵan jón.
Belgili óner adamdary, tarıhı tulǵalar týraly oı tolǵanymdary, ártúrli issaparlarda, jınalystarda jazylǵan derektemeler jınaqtalǵan qoıyn dápterleri de engizilgen.
Sonymen qatar kórmede «Qurmet» ordeni, «Mádenıet qaıratkeri», «Qazaqstannyń eńbek sińirgen qaıratkeri», «Qazaqstan Respýblıkasy Memlekettik syılyǵynyń laýreaty», «Qazaqstan Respýblıkasynyń ǵylymyn damytýǵa sińirgen eńbegi úshin» belgileri de qoıylǵan.
Qujattyq jeke qorda 1961-2009 jyldar aralyǵynda jazylǵan 700 jýyq hattar jınaqtalǵan. Sonyń ishinde kórmede Á. Marǵulan, M. Ǵabdýllın, L. Gýmılev, Ǵ. Músirepov, A. Toqmaǵambetov, Á. Tájibaev, Ǵ. Ormanov, O. Bókeı, J.Ábdihalyq, I.Tasmaǵambetov syndy memleket jáne qoǵam qaıratkerlerinen, aqyn-jazýshylardan, áriptesterinen kelgen 20-ǵa jýyq hattar oryn alǵan.
Rásimge Qazaqstan Respýblıkasy Parlamentiniń depýtattary, kórnekti memleket jáne qoǵam qaıratkerleri, aqyn-jazýshylar, ǵalymdar qatysady.
