Búgin QR Parlamenti Senatynyń depýtattyǵyna úmitkerlerdiń saılaýaldy úgit-nasıhat jumystary bastaldy
ASTANA. 30 shilde. QazAqparat /Arman Asqarov/ - Keshe QR Parlament Senaty depýtattyǵyna úmitker azamattardy tirkeý jumysy aıaqtalyp, búgin olardyń úgit-nasıhat is-sharalary bastalady.
Bul týraly búgin QR Ortalyq saılaý komıssııasynyń tóraǵasy Qýandyq Turǵanqulov málim etti.
Onyń habarlaýynsha, osy ýaqytqa deıin saılaý naýqanyna túsetin 52 úmitker tirkeldi. Olardyń 7-eýi - Parlament Senatynyń depýtaty, 22-si - memlekettik organdardyń qyzmetkerleri, 7-ýi - ǵylym, bilim men mádenıet ókilderi jáne 12 kásipker bar. Kandıdattardyń ortasha jasy - 54-te. Úmitkerlerdiń basym bóligi - «Nur Otan» partııasynyń músheleri.
«Búginnen bastap barlyq kandıdattar saılaýaldy úgit-nasıhat jumystaryna kirise alady. Josparǵa sáıkes, bul jumys tamyzdyń 17-i túngi saǵat 24.00-ge deıin júrgiziledi. Qazirgi kezde úmitkerlerdiń azdyǵyna baılanysty úgit-nasıhat jumysy tek Aqtóbe oblysynda ǵana tamyzdyń 6-syna deıin jalǵasady», - dedi Q.Turǵanqulov.
