Búgin QR QK áskerı-tarıhı mýzeıinde «Berel qupııalary» atty kórme ashylady

ASTANA. QazAqparat - Búgin QR Qarýly Kúshteriniń áskerı-tarıhı mýzeıinde «Berel qupııalary» atty kórme ashylady, dep habarlaıdy QR Mádenıet jáne sport mınıstrliginiń baspasóz qyzmeti.

Mınıstrlik taratqan málimetterge qaraǵanda, kórmede Berel saq (b.z.d. II-I ǵǵ.) qorǵandarynan tabylǵan buǵy-grıfon at ábzeliniń áshekeı buıymdary, er jáne áıel adamnyń bas súıegi negizinde jasalǵan antropologııalyq rekonstrýktsııalar, zoomorfty saby bar qola aına, áıel adamnyń áshekeı buıymdary jáne taǵy basqa qundy jádigerler kórsetiledi.

Atalǵan kórmeni uıymdastyrýdaǵy maqsat - EKSPO-2017 halyqaralyq kórmesi aıasynda myńdaǵan jyldar boıy saqtalyp kelgen asa qundy jádigerlerdi álem jurtshylyǵyna tanystyrý jáne qazaq jerin meken etken ejelgi taıpalardyń mádenıetterin nasıhattaý.

Berel qorymynda arheologııalyq qazba jumystaryna jetekshilik etken belgili professor, tarıh ǵylymdarynyń doktory Zaınolla Samashev. Tabylǵan jádigerlerge belgili restavrator Krym Altynbekov rekonstrýktsııa jasaǵan.

Kórme búgin saǵat 17:00-de Qazaqstan Respýblıkasy Qarýly kúshteriniń áskerı-tarıhı mýzeıinde ashylady. Atalmysh sharany Qazaqstan Respýblıkasy Mádenıet jáne sport mınıstrligi «Berel» memlekettik tarıhı-mádenı qoryq-mýzeıimen birlesip uıymdastyrýda.