Búgin QR Qarýly Kúshteriniń barlyq quramalary men áskerı bólimderi jaýyngerlik ázirlik rejiminde boldy
Óńirlik qolbasshylyqtardyń, Aeroutqyr áskerleriniń, barlyq Qarýly Kúshter túrleriniń áskerleri «oqý-jattyǵý dabyly» belgisi boıynsha kóterildi.
«Qazaqstan Respýblıkasy Qarýly Kúshterin joǵary deńgeıdegi jaýyngerlik daıyndyqqa keltirý Bas shtabtyń Ortalyq Basqarý núktesinde bastalady. Kezekshi Bas shtab bastyǵynyń buıryǵyn alysymen dereý jaýyngerlik basqarý jóninde dabyl beredi, bul óz kezeginde QR Qarýly Kúshterinde áskerı saptyq-tásildik daıyndyqtyń bastalǵanyn bildiredi»,-dep habarlady Qorǵanys mınıstrliginiń baspasóz qyzmetinen.
Bas shtabtyń Ortalyq Basqarý núktesindegi aýysymdaǵy kezekshiler búkil áskerı jasaqty habardar etedi. Qarýly Kúshterdegi Basshylyq quramǵa, Qarýly Kúshterdegi Bas Basqarý núktesindegi operatıvti kezekshilerge, óńirlik basshylyqtardaǵy basqarý núktelerine, basqa áskerı jasaqtar men qurylymdarǵa, Qarýly Kúshterdegi kezekshi áskerı bólimder men mekemelerge dabyl jiberiledi.
Ótkiziletin sabaqtardyń basty maqsaty - belgilengen merzimderde qoıylǵan mindetterdi oryndaýda basqarý organdary men jeke quram is-qımylynyń úılesimdiligin arttyrý bolyp tabylady.
Jaýyngerlik mashınalar parkinen kórsetilgen aýdandarǵa bes myńnan astam birlik qarý-jaraq pen áskerı tehnıka shyǵaryldy. Keıbir bólimsheler oqý-jattyǵý jaýyngerlik mindetterdi oryndaý aýdandaryna óz júrisimen marsh jasady. Áskerı áýeaılaqtarda 200-den astam birlik ushaq pen tikushaqty ushyrý júzege asyryldy. Avıatsııalyq tehnıkanyń bir bóligi qosalqy áýeaılaqtarǵa qaıta ornalastyryldy.
Osyndaı keń aýqymdy is-shara zamanaýı tehnıka men qarýlardyń shyǵýymen alǵash uıymdastyrylyp otyr.
Sabaqtar barysyn kórsetilgen aýdandarǵa marsh jasaýǵa jáne oqý-jattyǵý jaýyngerlik mindetterdi oryndaýǵa quramalar men bólimderdiń komandırlerine ókimderdi berip otyrǵan Bas shtabtyń jedel toby baqylap, baǵalap otyrdy.
Qazirgi tańda Qazaqstan Qarýly Kúshterinde armııany aldaǵy kásibılendirý boıynsha jumys atqarylyp, áskerı kadrlardy daıyndaý sapasy men talaptary arttyryldy. Sondaı-aq, jaýyngerlik daıyndyqtyn deńgeıi ósip, qorǵanys ónerkásibi kesheni men zań shyǵarýshylyq árekettiń sheńberinde kóptegen jumys atqaryldy.
Jańa oqý kezeńi barysynda áskerı qyzmetshiler aldynda jaýyngerlik daıarlyq deńgeıin arttyrý mindeti tur.
«Árqaısymyzdan úlken qajyrlylyq pen maqsatqa umtylys, jaýyngerlik daıyndyqtyń deńgeıin jetildirýge kásibılik pen jeke oryndaýshylyq tártip qajet»,- dep atap kórsetti Qazaqstan Qarýly Kúshteri Bas shtabynyń bastyǵy general-polkovnık Sáken Jasuzaqov.