Búgin QR Halyq ártisi Asanáli Áshimovtiń týǵan kúni
ASTANA. QazAqparat - «Qazaqfılm» kınostýdııasynyń jáne M.Áýezov atyndaǵy Qazaq memlekettik akademııalyq drama teatrynyń akteri, rejısser, QR Halyq ártisi ÁShІMOV Asanáli búgin 78 jasqa toldy.
Áıgili akter 1937 jyly Jambyl oblysynda týǵan. Qurmanǵazy atyndaǵy memlekettik konservatorııany bitirgen, drama teatrynyń akteri. T.Júrgenov atyndaǵy ulttyq óner akademııasynyń professory. Birneshe kitaptardyń avtory.
«Botagóz», «Asaý Ertis jaǵasynda», «Bir aýdanda», «Ushy-qıyrsyz jol» «Qyz Jibek», «Atamannyń aqyry», «Transsibir ekspresi», «Jaýshy» jáne basqa da kóptegen fılmderge túsken. Teatrda «Abaı» spektaklinde Abaı, «Eńlik-Kebekte» Kebek, «Qaraqypshaq Qobylandyda» Shýaq, «Qan men terde» Elaman rólderin somdady. N.Gogoldiń «Revızoryn», Ǵ.Músirepovtiń «Amangeldi», N.Oranbaevtyń «Men ishpegen ý bar ma?» J.Aımaýytovtyń «Aqbilek» spektaklderin sahnalady. «Shoqan Ýálıhanov», «Qozy Kórpesh - Baıan sulý», «Siz kimsiz, Ka myrza?» fılmderin túsirdi. 1990 jyldan «Elim-aı» kınostýdııasynyń prezıdenti. «Otan» ordenimen, M.V.Lomonosov atyndaǵy, «Altyn qyran» ordenderimen marapattalǵan. KSRO jáne QR Halyq ártisi, KSRO Memlekettik syılyǵynyń laýreaty.
