Búgin Kólik polıtsııasynyń qurylǵanyna 95 jyl toldy
ASTANA. QazAqparat - Búgin elimizdiń kólik polıtseıleri Kólik polıtsııasynyń qurylǵanyna 95 jyl tolý merekesin atap ótti. Bul týraly Kóliktegi ІІD baspasóz qyzmeti habarlady.
«Bul shyn máninde, sanaly ǵumyryn kólik polıtsııasyn qurýǵa arnap, onyń qalyptasýy jolynda aıanbaı ter tókken maıtalman ardagerlerimizdiń meıramy. Biz bul kúni qyzmettik mindetin atqarý kezinde qaza bolǵan asyl erlerimizdiń óshpes rýhy aldynda bas ıemiz. Olardyń jankeshti erligi men qaıtpas-qaısar batyrlyǵy quqyq qorǵaý salasynda qyzmet etip jatqan jas býynmen qatar, óskeleń urpaqqa ónege bolýy tıis», - dedi Kóliktegi ІІD bastyǵy, polıtsııa polkovnıgi Berik Bısenqulov.
Onyń aıtýynsha, alǵashqy qurylǵan kúnnen-aq kólik polıtsııasy elimizdiń ishki ister organdarynyń jetekshi qyzmeti bolyp sanaldy. Qazaqstan Respýblıkasynyń táýelsizdik alǵan jyldary ishinde kólik saqshylary el qaýipsizdigi men órkendeýi jolynda ózderine júktelgen mańyzdy memlekettik mindetterdi abyroımen atqardy.
«Budan bylaı da Departamenttiń jeke quramy men onyń bólinisterindegi qyzmetkerlerdiń quqyq tártibin nyǵaıtyp, azamattardyń zańdy múddeleriniń qorǵalýyn qamtamasyz etý úshin aıanbaı eńbek etetindigine senim bildiremin», - dep atap ótti polıtsııa polkovnıgi.
Saltanatty sharaǵa departament basshylyǵy, jeke quram men ishki ister organdarynyń ardagerleri qatysty. Іs-shara qyzmettik boryshyn óteý kezinde erlikpen qaza tapqan áriptesterge arnalǵan «Máńgi umytylmas esimder» eskertkishine gúl shoqtaryn qoıýdan bastaldy. Jınalǵandar jeke quramnyń máńgilik tizimine engen erlerdi bir sát únsizdikpen eske aldy. Shara barysynda ishki ister organdarynyń ardagerleri men Aýǵan soǵysynyń ınternatsıonalıst-jaýyngerleri de quttyqtaý sóz sóıledi.
Óz qyzmettik mindetin adal atqarǵan polıtsııa podpolkovnıgi S. Shynybekov pen polıtsııa polkovnıgi S. Osanovqa QR ІІM-niń medali men gramotasy tabys etildi. Sondaı-aq, mereıli merekede qyzmette joǵary nátıje kórsetken 252 qyzmetker departament basshylyǵynyń gramotalarymen jáne alǵys hattarymen marapattaldy.
