Búgin qol qoıylǵan qujat 2011 jyldyń qazanyna deıin astyq baǵasynyń turaqty bolýyna áser etedi - Eleýsin Saǵyndyqov
ASTANA. Qyrkúıektiń 4-i. QazAqparat /Marlan Jıembaı/ - Búgin qol qoıylǵan qujat 2011 jyldyń qazanyna deıin astyq baǵasynyń turaqty bolýyna áser etedi. Bul týraly búgin AShM men elimizdiń 6 oblysy arasynda óńirlerdi azyqtyq astyqpen qamtamasyz etý týraly memorandýmǵa qol qoıý barysynda Aqtóbe oblysynyń ákimi Eleýsin Saǵyndyqov aıtty.
«Biz óte mańyzdy qujatqa qol qoıdyq. Endi halyqtyń, máselen Aqtóbe oblysynyń astyqpen, un jáne nan ónimderimen qamtamasyz etý tóńiregindegi máselerge nemese baǵanyń kóterilýine oraı eshqandaı qobaljý men alańdaýshylyq bolmaýy tıis. Búgin qol qoıylǵan qujat 2011 jyldyń qazanyna deıin astyq baǵasynyń turaqty bolýyna áser etedi», dedi ol óz sózinde.
Degenmen, buǵan deıin Aqtóbe oblysy astyqty ózindik qunymen, ıaǵnı eski baǵamen satyp alǵandyǵyn atap ótken ákim un baǵasynyń 2-3 paıyz sheginde kóterilýi múmkindigin de joqqa shyǵarmady. «Nan baǵasy kelesi jylǵy ónimge deıin turaqty bolady ári aıtarlyqtaı kóterilmeıdi. Al un 2-3 paıyz sheginde qymbattaýy múmkin», dedi E.Saǵyndyqov.
Sonymen qatar nan baǵasynyń turaqtanýyna Úkimettiń, Aýyl sharýashylyǵy mınıstrliginiń, «Qazagro» UK» AQ-y men «Azyq-túlik korporatsııasy» ulttyq kompanııasynyń eńbegi zor ekendigin basa aıtqan oblys basshysy «biz adamdar múddesindegi máselelerdi aqyldasyp sheshkende, ásirese respýblıkamyz turaqty damyp otyrǵanda zor jetistikke jetýge bolady», dep túıindedi sózin.
