Búgin kıno salasyndaǵy «Altyn globýs» syılyǵy tapsyrylady
NUR-SULTAN. QazAqparat – 5 qańtarda AQSh-tyń Kalıfornııa shtatyndaǵy Los-Anjeles qalasynda «Altyn globýs» syılyǵyn tapsyrý rásimi ótedi. Bul syılyq osymen 77-shi ret kıno jáne televıdenıe salasyndaǵy úzdik týyndylarǵa tabys etilmek, dep habarlaıdy QazAqparat.
Ótken jylǵy «Altyn globýs» nomınanttary 2019 jyldyń 9 jeltoqsanynda belgili bolǵan edi. Saltanatty rásimdi NBC telearnasy tikeleı efırden kórsetedi. Kesh júrgizýshisi – brıtandyq komık Rıkı Jerve.
Búgingi saltanatty keshte 25 sanat boıynsha nomınanttar esimin Tım Allen, Dakota Fannıng, Sıýzen Kelechı Ýotson, HFPA prezıdenti Lorentso Sorııa, Dılan men Parıs Brosnan, sondaı-aq Berrı Adelman jarııalaıdy.
«Altyn globýsta» Sesıl B. De Mıldiń arnaıy syılyǵyn Tom Henks alady, al Ellen Dedjeneres taıaýda ǵana taǵaıyndalǵan Kerol Bernett syılyǵyna ıe bolady.
«Úzdik dramalyq fılm» atalymyna Todd Fıllıpstiń «Djoker», Martın Skorsezeniń «Irlandyq», Sem Mendestiń «1917», Noa Baýmbaktyń «Neke týraly hıkaıa» jáne Fernando Meırellıshtiń «Qos áke» fılmderi usynylyp otyr.
Búgingi sharada «Neke týraly hıkaıada» basty róldi somdaǵan Skarlett Iohansson, «Daý-damaıdaǵy» Sharlız Teron, «Kishkentaı áıelder» fılminde oınaǵan Sırsha Ronan, «Djýdı» fılminiń bas keıipkerin somdaǵan Rene Zellveger jáne «Garrıettegi» Sıntııa Erıvo «úzdik aktrısa» ataný úshin baq synaıdy.
Al «Úzdik akter» atalymyna nomınanttar qatarynda Krıstıan Beıl («Ford pen Ferrarı»), Antonıo Banderas («Qasiret men ataq»), Adam Draıver («Neke týraly hıkaıa»), Hoakın Fenıks («Djoker») jáne Djonatan Praıs («Qos áke») bar.
Úzdik anımatsııalyq fılm nomınatsııasy úshin «Muzdy ólke-2», «Aıdahardy qalaı qolǵa úıretýge bolady-3», «Arystan patsha», «Joǵalǵan býyn» jáne «Oıynshyqtar hıkaıasy-4» mýltfılmderi talasady.
Nomınanttar tizimin júldeniń resmı saıtynan kóre alasyzdar.
Aıta keteıik, «Altyn globýs» syılyǵyn 1944 jyldan beri Gollıvýdtyń sheteldik baspasóz qaýymdastyǵy tapsyryp keledi. Ol jyl saıyn 90-ǵa jýyq halyqaralyq jýrnalıstiń daýys berý nátıjesi boıynsha qańtar aıynda ótedi.
