Búgin keshten bastap janar-jaǵarmaı quıý stansalary Qazaqstanda benzın baǵasyn kóterýge quqyly

ASTANA. QazAqparat - Búgin keshten bastap Qazaqstanda Aı-92/93 benzıniniń baǵasy qymbattaıdy. Bul týraly QR Energetıka mınıstrligi Munaı ónerkásibin damytý departamentiniń dırektory Qýandyq Qulmurzın málim etti.

«Qazirgi kezdegi AI-92/93 markaly benzıniniń lıtrine baǵa 99 teńge kóleminde. Buıryq resmı jarııalanǵannan ýaqyttan bastap kúshine enedi. Osy qujat bizdiń saıtqa ornalastyryldy. Búgin keshki aýysymynan bastap janar-jaǵarmaı quıý stansalary Aı-92/93 benzıniniń lıtrine 108 teńge kóleminde shekti bólshek saýda baǵasyn qoıa alady»,-dedi Qulmurzın.

Budan buryn habarlanǵandaı, QR Energetıka mınıstri V.Shkolnık baǵalaryna memlekettik retteý belgilengen bólshek saýdada ótkiziletin munaı ónimderine shekti baǵalardy belgileý týraly buıryqqa qol qoıdy.

Energetıka mınıstrliginiń buıryǵyna sáıkes endi: dızel otyny - 1 lıtr úshin 99 teńge;

Aı-80 - 1 lıtr úshin 89 teńge;

Aı-92/93 - 1 lıtr úshin 108 teńgeni quraıdy.