Búgin keshqurym birqatar respýblıkalyq joldarda kólik qozǵalysyna shekteý engizildi
ASTANA. 11 jeltoqsan. QazAqparat - Aýa raıynyń qolaısyz jaǵdaıyna baılanysty birqatar oblystardyń aýmaǵyndaǵy respýblıkalyq mańyzy bar avtojoldarynyń qozǵalysyna shekteý qoıyldy. Bul týraly búgin «Qazaqavtojol» RMK-nyń baspasóz qyzmeti habarlaıdy.
18:30-dan bastap aýa temperatýrasynyń kúrt tómendeýine oraı Pavlodar oblysynyń barlyq baǵyttarynda avtokóliktiń barlyq túrleri úshin jolǵa shyǵýǵa tyıym salyndy.
Al Shyǵys Qazaqstan oblysy aýmaǵyndaǵy aıazdyń saldarynan 18:30-dan beri «Omby-Maıqapshaǵaı» avtojolynyń 587-733 shaqyrymyndaǵy «Pavlodar oblysy shekarasy-Semeı» ýchaskesi aralyǵynda qoǵamdyq jáne dızel otynymen júretin avtokólikterdiń qozǵalysyna shekteý engizildi.
Budan bólek, boranǵa baılanysty "Qaraǵandy-Aıagóz-Buǵaz" avtojolynyń 525-704 shaqyrymyndaǵy "Barshatas-Aıagóz" ýchaskesi aralyǵynda avtokóliktiń barlyq túrleri úshin jol jabyldy.
Sonymen qatar búgin keshqurym qatty aıazǵa baılanysty Qaraǵandy oblysy aýmaǵyndaǵy joldarda qoǵamdyq, júk jáne dızel otynymen júretin kólikterdiń qozǵalysyna tyıym salyndy.
Munymen qosa, saǵat 19:00-den bastap aýa temperatýrasynyń kúrt tómendeýine baılanysty Qostanaı oblysynyń barlyq baǵyttarynda qoǵamdyq jáne dızel otynymen júretin avtokólikterdiń qozǵalysyna tyıym salyndy.
Al Soltústik Qazaqstan oblysy boıynsha 14:00 bastap jol-qurylysy jumystaryn júrgizýge baılanysty (kópirdi jóndeý) Petropavl qalasynyń aınalma jolyndaǵy ýchaskede (3 km) avtokóliktiń barlyq túrleri úshin jol jabyldy. Jóndeý jumystary 15 jeltoqsanǵa deıin jalǵasady dep kútilýde.
