Búgin keshke elorda turǵyndary men qonaqtaryna arnalǵan merekelik bı keshi men otshashý bolady
ASTANA. 31 jeltoqsan. QazAqparat - Búgin Astanada saǵat 21.00-02.00 deıin elorda qonaqtary men turǵyndary Jańa 2014 jyldy qalalyq ákimdiktiń aldyndaǵy alańda Aıaz atamen jáne Aqshaqarmen birge qarsy alady.
Bul týraly astana.kz saıty Mádenıet basqarmasyna silteme jasap habarlady.
Jańa jyldy qarsy alýǵa arnalǵan dástúrli merekelik is-shara barysynda qazaqstandyq estrada juldyzdarynyń, memlekettik fılarmonııaıa ártisteriniń jáne Astana qalasynyń basqa da shyǵarmashylyq ujymdarynyń qatysýymen kontserttik baǵdarlama usynylady.
Saǵat 23.55 alańda ornatylǵan LED-ekrandary arqyly Qazaqstan Respýblıkasynyń Prezıdenti Nursultan Nazarbaevtyń jańa jyldyq quttyqtaýy kórsetiledi. Al tún jarymda elorda turǵyndary men qonaqtary Esil ózeniniń jaǵasynda Jańa 2014 jyldyń týýynyń belgisi keremet otshashýdy tamashalaıdy.
Jańa jyldyq is-shara kóńildi baıqaýlarmen jáne otandyq estrada juldyzy Almas Kishkenbaevtyń ánderimen ótetin merekelik bı keshimen aıaqtalady.
