Búgin keshke Astanada HІІ-shi halyqaralyq «Shabyt-2009» shyǵarmashyl jastar festıvali ashylady

 dep habarlaıdy QazAqparat.

 Beıneleý óneri (sándik qoldanbaly óner), klassıkalyq bı, klassıkalyq mýzyka (fortepıano, skrıpka), ádebıet (proza), halyq mýzykasy (dombyra, sherter) jáne estradalyq vokal atalymdary boıynsha festıvalǵa bıyl 491 úmitker qatysady. Qarashanyń 4-i men 8-i kúnderi olar óz ónerlerin Qazaqstan, Ulybrıtanııa, Italııa, Avstrııa, Túrkııa, Shveıtsarııa, Koreıa, Qyrǵyzstan, Reseı jáne Frantsııa elderiniń óner maıtalmandarynan quralǵan qazylar alqasy men kórermender nazaryna usynatyn bolady.

 Tıisti atalymdar boıynsha qazylar alqalarynyń tóraǵalary - Abaı atyndaǵy opera jáne balet teatrynyń bas baletmeısteri Ramazan Bapov, álemge tanymal pıanıst Eleonora Bekova, Qazaq Ulttyq mýzyka akademııasynyń rektory, belgili skrıpkashy Aıman Musaqojaeva, Qazaqstannyń halyq jazýshysy Farıza Ońǵarsynova, Qyrǵyz Respýblıkasynyń halyq ártisi Muratbek Begalıev jáne taǵy basqalar.

 Sondaı-aq, qatysýshylardyń ónerin esimi álemge áıgili pıanıst, Venalyq Shýbert trıosynyń negizin qalaýshy Klaýs Shýster, Reseı halyq ártisi Sergeı Kravchenko, ataqty dırıjerlar Amorı dý Klozel jáne Klaýd Vılaret, London Koroldik óner akademııasy men Seýl ýnıversıtetiniń ókilderi jáne basqalar baǵalaıtyn bolady.

 F.Ońǵarsynovanyń aıtýynsha, «ádebıet» atalymy boıynsha bıyl barlyǵy 45 týyndy kelip túsken. Onyń 10-y qazaq, qalǵandary ózge ulttar tilinde. Sondaı-aq aqyn, aldaǵy ýaqytta «Shabyt» halyqaralyq festıvaliniń 11 jyldyq tarıhynda laýreat atanǵan qatysýshylardyń shyǵarmalary engizilgen jınaq kitap shyǵarylatynyn jetkizdi. 

 Óz kezeginde A.Musaqojaeva, Astana - tek el ordasy ǵana emes, sondaı-aq mádenıettiń  de ortalyǵy bolyp tabylatyndyqtan, «Shabyttyń» aýqymy jyl sanap keńeıip otyrǵanyn atap ótti.