Búgin Keńes áskeriniń aýǵan jerinen shyǵarylǵanyna 21 jyl toldy
/strong>Aqpannyń 15-i. QazAqparat /Ádilet Musahaev/ - Búgin Keńes jaýyngerleriniń aýǵan jerinen shyǵarylǵanyna 21 jyl tolýyna baılanysty Almatydaǵy 28 gvardııashy-panfılovshylar saıabaǵyndaǵy máńgilik alaý men aýǵan soǵysyna qatysýshylardyń eskertkishine saltanatty túrde gúl shoqtaryn qoıý rásimi ótti,
dep habarlaıdy QazAqparat.
Atalmysh soǵysqa 22269 qazaqstandyq jaýynger qatysqan, olardyń 924-i soǵysta qaza tapsa, 21-i is-tússiz joǵalyp ketken.
Qazirgi tańda Almaty qalasynda 18 aýǵan ardagerleriniń uıymdary óz qyzmetterin atqaryp keledi. Olardyń jumystary aýǵan ardagerleriniń áleýmettik máselelerin sheshýge jáne osy sanattaǵy adamdarǵa túrli deńgeıde kómek kórsetýge baǵyttalǵan.
Shara barysynda aeromobıldi bólimshe jaýyngerleriniń túrli qoıylymdary kórsetilip, soǵysta alǵash qaza tapqan jaýyngerlerge arnap shyǵarylǵan 25 mınýttyq «Oralý» derekti fılmi kórsetildi.
«Men 1987-1989 jyldary aýǵan jerinde Otan aldyndaǵy boryshymdy ótedim. Ol soǵystyń durys-burystyǵyn qazir kóp aıtýda, degenimen biz berilgen buıryqty oryndadyq. Kóptegen otandastarymyz jaraqat alyp, múgedek bolyp oraldy. Endigi kezekte elimizdegi jastardyń basyna mundaı surapyl soǵysty bermesin degim keledi», deıdi polkovnık Berdáli Ermekbaev.
Sondaı-aq sharaǵa «Nur Otan» Almaty qalalyq fılıaly tóraǵasynyń birinshi orynbasary Amangeldi Karimollın, Medeý aýdany ákimshiligi ókilderi, aýǵan soǵysy ardagerleri uıymdarynyń basshylary qatysty.
«Bul óte aýyr soǵys boldy, kóptegen azamattarymyz qaıtpaı qaldy. Al oralǵandary elimizdiń jastaryna patrıottyq tárbıe berip, úlken jumystar atqaryp jatyr», dedi A.Karimollın óz sózinde.
