Búgin qazaqtyń qaharman qyzy Mánshúk Mámetovanyń týǵanyna - 100 jyl
ASTANA. QazAqparat – Osydan 100 jyl buryn, ıaǵnı 1922 jyly 23 qazanda aty ańyzǵa aınalǵan pýlemetshi, Keńes Odaǵynyń Batyry ataǵyna ıe bolǵan alǵashqy qazaq qyzy Mánshúk Mámetova dúnıege keldi, dep habarlaıdy QazAqparat tilshisi.
Qazaqtyń qaharman qyzy sol kezdegi Oral oblysy Bókeı Orda aýdanynyń Jasqus aýylynda týǵan. Otbasyndaǵy besinshi bala. Ata-anasy dúnıe salǵannan keıin, ony Almatydaǵy ápkesi qolyna alady. Mánshúk Mámetova orta mektepte, Almaty medıtsınalyq ınstıtýtynda oqydy. Sonymen birge, ol Qazaq KSR Halyq Komıssarlary keńesiniń hatshylyǵynda jumys istedi.
1942 jyly Almaty medıtsınalyq ınstıtýtynyń eki kýrsyn támamdap, óz erkimen maıdanǵa attanady. Sol jyldyń tamyzynda qazaqtyń batyr qyzy Qyzyl Ásker qataryna alynyp, bastapqyda qujattardy toltyratyn qyzmetker, keıin dalalyq aýrýhana medbıkesi bolady.
Ol bos ýaqytynda «Maksım» pýlemetiniń qurylymyn, jumys prıntsıpin zertteýmen aınalysady. Osydan soń ózin atqyshtar bólimine aýystyrýyn ótinip, ruqsat alady. 1943 jyly 15 qazanda halqymyzdyń qaharman qyzy Kalının fronty áskerleriniń quramynda Pskov oblysynyń Nevel qalasyn azat etý shaıqasyna qatysqan. Gvardııa aǵa serjanty, pýlemetshi Mánshúk Mámetova osy urystarda óziniń mergendigimen, batyldyǵymen kózge túsedi. Nevel qalasyn azat etý operatsııasy barysynda ol basynan aýyr jaraqat alǵanyna qaramastan, jaýdyń 70 sarbazyn jer jastandyryp, erlikpen qaza tapty.
Qazaqtyń batyr qyzy Nevel qalasynda jerlengen.
Oǵan qaıtys bolǵannan keıin 1944 jylǵy 1 naýryzdaǵy KSRO Joǵarǵy Keńesi Prezıdıýmynyń Jarlyǵymen Keńes Odaǵynyń Batyry ataǵy berildi.
Bıyl batyrdyń 100 jyldyǵy qarsańynda Oral halyqaralyq áýejaıyna Mánshúk Mámetovanyń esimi berildi.
Sondaı-aq, Oral qalasynda Mánshúk Mámetovany eske alýǵa arnalǵan dzıýdodan erler men áıelder arasynda H ashyq respýblıkalyq týrnır uıymdastyryldy.
Al, 9 mamyr – Jeńis kúni merekesin atap ótý aıasynda Memlekettik keńesshi Erlan Qarın ekinshi dúnıejúzilik soǵys qaharmany Mánshúk Mámetovanyń Astanada ornatylǵan eskertkishine gúl shoqtaryn qoıdy.
Foto: histrf.ru
