Búgin Qazaqstannyń keı aımaqtarynda burshaq jaýýy múmkin - Qazgıdromet
ASTANA. QazAqparat - Elimizdiń aýmaǵynyń basym bóliginde atmosferalyq aýa aǵymdarynyń ótýine baılanysty turaqsyz aýa raıy saqtalady, keı jerlerde qatty jańbyr jaýyp, naızaǵaı oınaıdy.
Keı óńirlerde jel kúsheıip, burshaq jaýýy yqtımal, tek respýblıkanyń batys, soltústik batys jáne ońtústik batysynda aýa raıy shaýyn-shashynsyz, dep habarlaıdy «Qazgıdromet» RMK.
Almaty oblysynyń keı jerlerinde jeldiń kúshi 15-20, ekpini 28 m/s bolady, burshaq jaýýy yqtımal. Aqmola, Pavlodar oblystarynyń basym bóliginde jel 15-20 m/s kúsheıedi, keı jerlerinde burshaq jaýýy múmkin. Qostanaı oblysynyń basym bóliginde jel 15-20 m/s kúsheıedi. Kúndiz Mańǵystaý oblysynyń keı jerlerinde jel 15-20 m/s kúsheıip, shańdy daýyl bolady. Ońtústik Qazaqstan, Soltústik Qazaqstan, Qaraǵandy, Shyǵys Qazaqstan, túnde Jambyl oblystarynyń keı jerlerinde jeldiń ekpini 15-20 m/s bolady. Al Atyraý, Batys Qazaqstan, Qyzylorda, Ońtústik Qazaqstan, Jambyl, Almaty oblystarynyń keı jerlerinde óte joǵary órt qaýpi saqtalady.
