Búgin Qazaqstannyń birqatar aımaqtarynda burqasyn, kóktaıǵaq bolady, 28 m/s jyldamdyqqa deıin jel turady - TJM
ASTANA. Jeltoqsannyń 5-i. QazAqparat - Búgin, jeltoqsannyń 5-i kúni respýblıkanyń birqatar aımaqtarynda burqasyn soǵyp, kóktaıǵaq bolady. Keı jerlerde jeldiń jyldamdyǵy sekýndyna 28 metrge deıin jetedi dep boljanýda,
dep habarlaıdy QazAqparat QR Tótenshe jaǵdaılar mınıstrligine silteme jasap.
TJM-nyń habarlaýynsha, senbide Qazaqstannyń soltústik aımaǵy Batys Sibir aýmaǵynan keletin arktıkalyq aǵymdar bóliginiń yqpalynda bolady. Al respýblıkanyń ońtústik-shyǵysyna tómen atmosferalyq qysym áser etetin bolady.
Qostanaı, Soltústik Qazaqstan, Aqmola men Pavlodarda, sondaı-aq Shyǵys Qazaqstannyń keı jerlerinde burqasyn bolyp, sekýndyna 17-22 metr jyldamdyqpen jel soǵady dep kútilýde. Pavlodar oblysynda keı jerlerde - kóktaıǵaq bolady.
Qaraǵandy oblysynda keı jerlerde - burqasyn, tuman, kóktaıǵaq bolyp, sekýndyna 15-20 metr jyldamdyqta jel turady.
Aqtóbe, Jambyl, Qyzylorda, Ońtústik Qazaqstan jáne Almaty oblystarynda keı jerlerde tuman, kóktaıǵaq bolady. Túnde Almaty oblysy Jalańashkól aýmaǵynda ońtústik-shyǵystan 18-23 m/s, keı ýaqyttarda 25-28 m/s-qa deıin jel soǵady.
Atyraý jáne Batys Qazaqstan oblystarynyń keı aýmaqtaryna tuman túsedi.
Sondaı-aq, aldaǵy úsh táýlikte Qazaqstannyń soltústik aýmaǵyndaǵy ózender men kólderde muz qatý protsesiniń kúsheıýi baıqalatyn bolady. Shyǵys Qazaqstan oblysynyń keı ózenderinde sý deńgeıiniń kóterilýi yqtımal. Al Ońtústik Qazaqstan oblysynyń shekarasyndaǵy Syrdarııa ózeninde sý deńgeıiniń tómendeýi baıqalyp, sýdyń beti salqyndaıdy dep kútilýde.
