Búgin Qazaqstannyń basym bóliginde úsik júredi
NUR-SULTAN. QazAqparat - Búgin, 15 qyrkúıek kúni Qazaqstannyń basym bóligi keń, sýyq antıtsıklonnyń yqpalynda bolady, jaýyn-shashynsyz aýa raıy kútiledi, túngi saǵattarda tuman jáne úsik júredi, dep habarlaıdy QazAqparat Qazgıdrometke silteme jasap.
Atmosferalyq frontaldy bólikterdiń ótýimen batysta jańbyr jaýady, kún kúrkireıdi, burshaq jaýýy múmkin, shyǵysta jaýyn-shashyn, keıde jańbyr men sýly qar túrinde túsedi. Elimizdiń basym bóliginde jeldiń jyldamdyǵy 15-20 m/s, ońtústik-batysta, ońtústik-shyǵysta ekpini 23-28 m/s deıin barady, kúndiz batystan, ońtústikten shańdy daýyl soǵady.
Qyzylorda, Túrkistan, Jambyl oblystarynda, Atyraý oblysynyń batysynda tótenshe órt qaýpi saqtalady.
Túnde Aqmola, Qostanaı oblystarynyń soltústik-shyǵysynda, Soltústik Qazaqstan oblysynyń ońtústik-shyǵysynda, Pavlodar oblysynyń batysynda, ońtústiginde, Qaraǵandy oblysynyń soltústik shyǵysynda, Ulytaý, Shyǵys Qazaqstan oblystarynyń soltústiginde, shyǵysynda, Abaý oblysynyń soltústiginde 1-3 gradýs úsik júredi.
Nur-Sultan qalasynda kóshpeli bultty, jaýyn-shashynsyz. Ońtústik-shyǵys, shyǵys baǵyttardan soǵatyn jeldiń kúshi túnde 2-7, kúndiz 5-10 m/s bolady. Aýanyń temperatýrasy túnde +2+4°S, topyraq betinde 2°S úsik, kúndiz +16+18°S bolady.
Al Almaty qalasynda kóshpeli bultty, jaýyn-shashynsyz. Soltústik-shyǵystan jel soǵady, kúshi - 3-8 m/s. Aýanyń temperatýrasy túnde +8+10°S, kúndiz +21+23°S bolady.
Shymkent qalasynda azdaǵan bultty, jaýyn-shashynsyz. Jel shyǵystan soǵady, kúshi - 8-13 m/s. Aýanyń temperatýrasy túnde +14+16°S, kúndiz +31+33°S bolady.
