Búgin Qazaqstannyń barlyq meshitterinde órtten qaza bolǵan ózbekstandyqtardyń rýhyna duǵa jasalady

ASTANA. QazAqparat - Búgin Qazaqstan meshitterinde ótetin juma namazynda Aqtóbe oblysynda avtobýstyń janýy saldarynan qaza bolǵan jandardyń rýhyna duǵa oqylady, dep habarlaıdy QazAqparat QR Musylmandary dinı basqarmasyna silteme jasap.

Eske salsaq, keshe, 17 qańtar kúni Aqtóbe oblysy Yrǵyz aýdanynyń Qalybaı aýylyna jaqyn mańda avtobýstan órt shyǵyp, 52 jolaýshy kóz jumdy. Olardyń barlyǵy Ózbekstan azamattary.

Osyǵan oraı, Qazaqstan musylmandary dinı basqarmasynyń tóraǵasy, Bas múftı Serikbaı qajy Oraz qaza bolǵan ózbek baýyrlarymyzdyń qaıǵysyna ortaqtasyp, Ózbekstan musylmandaryna hat joldady.

Sonymen qatar, Bas múftı elimizdiń barlyq ımamdaryna búgingi juma namazynda qaza bolǵan ózbek aǵaıyndardyń rýhyna duǵa baǵyshtaýdy surap, jedel hat joldady.