Búgin Qazaqstannyń áskerı polıtsııasy qurylǵan kún

ASTANA. QazAqparat – QR Qarýly kúshteri áskerı polıtsııasynyń áskerı qyzmetshileri kásibı merekesin atap ótýde, dep habarlaıdy QazAqparat QR Qorǵanys mınıstrliginiń baspasóz qyzmetine silteme jasap.

Áskerı polıtsııanyń tarıhy 1997 jylǵy 22 sáýirde Prezıdent qol qoıǵan Qazaqstan Respýblıkasynyń Quqyq qorǵaý organdary júıesin odan ári reformalaý jónindegi sharalar týraly Jarlyqtan bastaldy.

26 jyl ishinde áskerı polıtsııada áskerı ortadaǵy quqyq buzýshylyqty baqylaý men aldyn alýdyń tıimdi júıesi quryldy.

Bıylǵy jyldyń 14 naýryzynda qabyldanǵan Áskerı polıtsııa organdary týraly jańa zań da Qarýly kúshterdegi quqyqtyq tártipti nyǵaıtýǵa, olardyń mártebesin arttyrýǵa jáne ókilettikterin keńeıtýge baǵyttalǵan.

Anyqtaý, jedel-izdestirý fýnktsııalaryn júzege asyratyn, quqyqtyq tártipti, áskerı qyzmettiń, jol júrisiniń qaýipsizdigin qamtamasyz etetin áskerı polıtsııa qarý-jaraqtyń ozyq túrlerimen jáne arnaıy tehnıkalyq quraldarmen jaraqtandyrylǵan.

Olardyń arsenalynda zamanaýı avtomobılder, jyljymaly beketter, obektilerdi qashyqtan baqylaý keshenderi, lazerlik qashyqtyq ólshegishter, beınetirkegishter jáne tekserý endoskoptary bar.

Jyl saıyn 80-nen asa adam áskerge shaqyrý jáne odan ári qyzmet ótkerý úshin áskerı polıtsııa mamandaryn daıarlaý ortalyǵynda bastapqy oqýdan ótedi. Áskerı kınologtardyń kásibı sheberligi halyqaralyq deńgeıde tanylyp keledi. Áskerı polıtseıler Qazaqstan Qarýly kúshteriniń spartakıadalaryna, armııalyq kópsaıysqa, jeńil atletıkalyq jáne halyqaralyq jarystarǵa belsendi túrde qatysyp, árkez júldeli oryndar alyp júr.

«Olardyń kásibı sheberligi men qoıylǵan mindetterdi oryndaýǵa jaýapkershilikpen qaraýy eldiń qorǵanys qabiletin nyǵaıtyp, qazaq áskeriniń ımıdjin arttyrýǵa yqpal etedi»,-delingen habarlamada.