Búgin Qazaqstannyń 5 qalasynda aýa sapasy tómendeıdi
ASTANA. QazAqparat - Beısenbi, 1 naýryz kúni Qazaqstannyń 5 qalasynda aýa sapasy tómendeıdi, dep habarlaıdy QazAqparat «Qazgıdromet» RMK-ǵa silteme jasap.
Atap aıtqanda, Astana, Aqtaý, Jańaózen, Aqtóbe jáne Qostanaı qalalarynda meteojaǵdaılar aýada lastaýshy zattardyń jınalýyna yqpal etedi.
Al Almaty, Atyraý, Balqash, Qaraǵandy, Temirtaý, Kókshetaý, Qyzylorda, Aqsaı, Oral, Óskemen, Aqsý, Ekibastuz, Pavlodar, Petropavl, Taldyqorǵan, Taraz jáne Shymkent qalalarynda kerisinshe, lastaýshy zattar atmosferada ydyraıdy.
Aıta keteıik, 2018 jyldyń 1 qańtarynan Qazgıdromettiń www.kazhydromet.kz saıtynda qolaısyz meteorologııalyq jaǵdaıǵa (QMJ) boljamdar jarııalanady.
QMJ - atmosferalyq aýanyń betki qabatynda zııandy (lastaýshy) zattardyń jınalýyna yqpal etetin qysqamerzimdi meteorologııalyq faktorlardyń (tymyq, jeńil jel, tuman, ınversııa) úılesimi. QMJ jaǵdaıynda eldi mekenderdegi atmosferalyq aýanyń sapasy nasharlaýy múmkin.
Lastaný deńgeıiniń qalyptasýyn anyqtaıtyn mańyzdy faktorlardyń biri - sınoptıkalyq jaǵdaıdyń (jel, jaýyn-shashyn, ylǵaldylyq, aýa temperatýrasy) boljamy.
Foto: fyi.uwex.edu
