Búgin qazaqstandyqtar túsken «Amazonkalar» fılmniń tusaýkeseri ótedi
ASTANA. QazAqparat - Ańyzǵa aınalǵan amazonkalar jaıly derekti fılm búgin efırge shyǵady. Bul jaıly kartınanyń ekshn-sahnasynyń qoıýshysy, Nomad Stunts kaskaderler tobynyń jetekshisi Jaıdarbek Kúngújınov áleýmettik jelidegi paraqshasynda jarııalady.
«Amazonka» fılminiń túsirýshi toby men osy fılmdi asyǵa kútken jurtshylyqqa qýanyshty habarymyz bar. Fılm VIASAT HISTORY arnasynyń efırine shyǵady. 9 qarashaǵa qaraǵan túni saǵat 02:00-de! 9 qarasha kúni saǵat 10:05 jáne 22:25-te qaıtalanady. Arna baǵdarlamasyn nazarda ustańyzdar. Baǵdarlamada fılm túpnusqasyndaǵy «EPIC WARRIOR WOMEN»-nen aýdarǵanda «Jaýynger áıelder» degen ataýmen júr. Bizben jumys istegenderdiń bárine alǵys bildiremin. Kásibı mamandarmen jumys istegen óte qyzyqty boldy», - dep jazdy Feısbýktegi paraqshasynda J.Kúngújınov.
Smıtson ınstıtýtynyń halyqaralyq jobasy sanalatyn fılmde saq jáne skıf taıpalaryndaǵy jaýynger áıelderi jaıly baıandalady. Kartına tarıhı janrda túsirilip, qoıylymdyq túsirilimder men ǵalymdardyń suhbaty negizinde qurylǵan.
Fılm bólimderiniń biri Almaty oblysynyń Jambyl aýdanynda túsirildi.
