Búgin qazaqstandyqtar el prezıdentin tańdaıdy
ASTANA. QazAqparat - Búgin, 26 sáýir kúni elimizde QR Prezıdentiniń kezekten tys saılaýy ótedi. Keshe Ortalyq saılaý komıssııasynyń ókilderi eldegi barlyq saılaý ýchaskeleriniń daýys berý kúnine daıyn ekendigin málimdedi.
Kezekten tys saılaý barysyn halyqaralyq uıymdardan jáne shet memleketterden 1024 akkredıttelgen baıqaýshy baqylaıdy.
«Búgingi tańda bizde 9 741 saılaý ýchaskesi saılaýǵa tolyq daıyn. Olar kadrlyq, materıaldyq turǵydan qamtamasyz etildi. Saılaýshylardyń tizimi túzildi. Munyń barlyǵy jasaldy jáne biz saılaýshylardyń óziniń saılaý quqyǵyn júzege asyrýy úshin daıynbyz», - dedi QR Ortalyq saılaý komıssııasynyń tóraǵasy Qýandyq Turǵanqulov.
Respýblıka boıynsha tańǵy saǵat 7.00-de barlyq saılaý ýchaskeleri ashylady.
QR Prezıdenti saılaýynyń aldyn ala qorytyndysy 27 sáýirde jarııalanady. Daýys berý aıaqtalǵannan keıin ýchaskelik saılaý komıssııalary 12 saǵattyń ishinde daýystardy sanaýǵa mindetti. Osydan keıin qujattar aýmaqtyq saılaý komıssııalaryna jetkizilip, árbir saılaý komıssııasy deńgeıinde daýys berýdiń aldyn ala qorytyndysy boıynsha sáıkesinshe hattama jasalady. Al 7 kúnniń ishinde saılaýdyń sońǵy qorytyndysy shyǵarylady.
