Búgin Qazaqstanda ulttyq ǵashyqtar kúni atalyp ótpek
ASTANA. QazAqparat - Sońǵy jyldary elimizdegi jastar uıymdarynyń, stýdentter qaýymynyń, bastamashyl toptardyń uıtqy bolýymen 15 sáýir - ulttyq ǵashyqtar kúni retinde atalyp ótýde.
2011 jyly Almaty qalasy ákimdiginiń jastar saıasaty basqarmasy bul kúndi ózderiniń resmı sharalarynyń qataryna qosqan bolatyn. Al 2012 jyly Astanadaǵy S.Seıfýllın atyndaǵy Qazaq agrotehnıtkalyq ýnıversıtetiniń stýdentteri mahabbat kúnin qazaqtyń ulttyq «Aqsúıek» oıynymen jańǵyrtyp, jastar oıyn-saýyǵyn uıymdastyrdy. Almatyda bıylǵy jyly osy mereke qarsańynda «Mahabbat jubyn» da atap úlgirgen.
Bul ataýly kún buryn aqpan aıynda atalyp ótip júrgen halyqaralyq ǵashyqtar kúnine balama retinde Qozy Kórpesh pen Baıan sulýdyń mahabbaty men súıispenshiligine arnalýda.
Sóıtip, elimizde ulttyq mádenıetimizge, halqymyzdyń salt-dástúrleri men adamgershilik rýhyna negizdelgen jańa turpatty mereke dástúrge aınalyp keledi. Endi ony ulttyq dástúrlerimizben jarastyryp, odan ári baıytý, ári qaraı jalǵastyrý - qoǵamnyń, ásirese jastar qoǵamynyń mindeti. Qazaqstanda Eńlik-Kebek, Qyz Jibek pen Tólegen sııaqty túrli ǵashyqtardyń atymen atalatyn mahabbat merekesin toılaý týraly usynys aıtylyp ta, jazylyp ta júr. Іs júzinde olardyń eshqaısysy 14 aqpan kúngi Áýlıe Valentın sııaqty keń dárejede atalyp ótken emes. Biraq ulttyq merekeniń qoǵamǵa sińip ketetine senetin adamdar kóbeıip keledi.
13-14 ǵasyrlardaǵy "Qozy Kórpesh Baıan sulý" eposy bir-birine qosyla almaǵan ǵashyq jigit pen qyzdyń qaıǵyly mahabbatyn jyrlaıdy. Osy epos boıynsha kınofılm túsirilgen, qazaq ádebıetiniń klassıgi Ǵabıt Músirepovtiń attas pesasy bar. Onyń jelisimen 1940 jyly M.Áýezov atyndaǵy Qazaq memlekettik akademııalyq drama teatrynda sahnalanǵan pesa qazirge deıin teatr repertýarynan turaqty oryn alyp keledi. Shyǵys Qazaqstan oblysynyń Aıagóz aýdanyndaǵy Tańsyq aýylynyń mańynda Aıagóz ózeniniń oń jaǵalaýynda ornalasqan Qozy Kórpesh- Baıan Sulý mazary - 10-11 ǵasyrlarda turǵyzylǵan sáýlet óneri eskertkishi.
