Búgin Qazaqstanda Ulttyq biryńǵaı testileý bastalady
ASTANA. QazAqparat - 2-8 maýsym aralyǵynda Qazaqstan Respýblıkasynda Ulttyq biryńǵaı testileý (UBT) ótkiziledi.
2004 jyldan bastap, 11 jyldyń ishinde UBT-ǵa 1 mıllıon 422 myń mektep bitirýshi qatysqan, bul bitirýshilerdiń jalpy sanynyń 80 paıyzyn quraıdy. Aǵymdaǵy jyly UBT ótkizý pýnktteriniń sany taǵy 10-ǵa kóbeıdi, olar oblystardyń shalǵaı aýdandarynda: Aqtóbe (Alǵa, Mártók, Qarǵaly aýdandary); Almaty oblysy (Іle aýdany); Atyraý (Isataı aýdany); Qaraǵandy (Aqtoǵaı aýdany); Qyzylorda (Jalaǵash aýdany); Shyǵys Qazaqstan (Abaı aýdany, Kýrchatov q) jáne Semeı qalasynyń Qazaq ınnovatsııalyq gýmanıtarlyq-zań ýnıversıtetiniń bazasynda ashyldy. Jalpy mundaı pýnktter sany respýblıkada 165-ke jetti, onyń 116-sy aýdan ortalyqtarynda, 49-y oblys ortalyqtarynda jáne Astana men Almaty qalalarynda ornalasqan.
Esterińizge sala keteıik, UBT-ny ótkizý qaǵıdalaryna ózgerister engizilgen bolatyn. Bıyldan bastap kámelettik attestatqa UBT men pán boıynsha jyldyq baǵanyń qorytyndysy boıynsha ortasha arıfmetıkalyq somasyndaǵy quramdyq baǵa qoıylady. Daý týdyratyn jaǵdaıda baǵany dóńgelekteý kóterý jaǵyna jasalady. UBT-nyń formaty ózgergen joq.
Jyl saıyn test tapsyrmalarynyń bazasy 20-30%-ǵa jańartylyp otyrady.
Oblys ortalyqtarynda jáne Astana men Almaty qalalarynda UBT ótkizý kezinde mektep bitirýshiler men olardyń ata-analarynyń ótinishteri men shaǵymdaryna jedel den qoıý úshin UBT-ny ótkizý jáne úılestirý jónindegi shtabtar qurylady. Mınıstrlik janynan Respýblıkalyq shtab jumys atqarady. 2015 jyldan bastap UBT qorytyndysy qupııa aqparat bolady, ony jeke sáıkestendirý nómiri (JSN) boıynsha ǵana bilýge bolady. Alǵan ball tiziminde bitirýshiniń tegi JSN-men almastyrylady. Sondaı-aq, UBT qorytyndysy Ulttyq testileý ortalyǵynyń www.testcenter.kz saıtynda jarııalanatyn bolady. Servıske qol jetkizý úshin JSN men emtıhan bastalar aldynda beriletin jeke kodty engizý talap etiledi.
2015 jyly Qazaqstan Respýblıkasynda mektepti 124 379 túlek bitirdi; onyń ishinde UBT-ǵa qatysýǵa 87 782 ótinish berildi, ol mektep bitirýshilerdiń jalpy sanynyń 71% quraıdy. Onyń 62 384-i qazaq tilinde, 25 398-i orys tilinde oqyǵan mektep bitirýshiler. 2015 jyly UBT-ǵa alǵash ret 12 jyldyq bilim berý baǵdarlamasy boıynsha bilim alǵan bitirýishler qatysady. Olarǵa arnalyp 12 jyldyq bilim berý baǵdarlamasy negizinde test tapsyrmalary bazasy ázirlendi.
