Búgin Qazaqstanda Bilim kúni atap ótilýde (FOTOREPORTAJ)
ASTANA. QazAqparat - Búgin Qazaqstanda Bilim kúni atalyp ótilýde. Respýblıkada 7,6 myń mektepte 2,6 mln. bala partaǵa otyryp, bilimge bas qoıdy, olardyń 300 myńy - birinshisynyptyq oqýshylar.
Qazaqstannyń bas qalasy - Astanada bes jańa mektep ashyldy. Olardyń árqaısysy 1200 elordalyq oqýshylardy qabyldaı alady. Olardyń birinde, №75 zamanaýı gımnazııada Memleket basshysy Nursultan Nazarbaev bolyp, ony aralap kórdi.
Bul oqý ornynda zamanaýı jabdyqtarmen, konferents-zalmen, ınteraktıvti jabdyqtarmen jaraqtanǵan 56 kabınetteri, elektrondyq abonementti kitaphanasy bar. Mektepte oqýshylardyń ǵarysh, medıtsına salasynda ǵylymı-zertteýlermen aınalysýy úshin zerthana jasaqtalǵan.
Memleket basshysy barsha qazaqstandyqtardy Bilim kúnimen quttyqtady. Prezıdent balanyń jaqsy azamat bolyp ósýi ata-analary men muǵalimderine baılanysty ekenin jetkizdi.
- Balalardy patrıottyq pen toleranttylyq rýhynda tárbıeleý kerek. Olar dostyqqa adal bolyp, ata-ana men úlkenderdi qurmetteýi tıis. Osynyń bári bizdiń qoǵamnyń eshqashan mánin joǵaltpaıtyn qundylyqtary, biz ony balalarymyzǵa mıras etýimiz kerek», - dep atap kórsetti Memleket basshysy.
Saltanatty jıyn jáne ashyq sabaqtar eldiń barlyq óńirlerinde ótti. Naq osy kúni balǵyn qazaqstandyqtar úshin 63 jańa mekteptiń esikteri aıqara ashyldy. Al táýelsizdik jyldary elimizde 1 myń mektep salyndy.
