Búgin - Qazaqstan Respýblıkasynyń Memlekettik rámizderi kúni
ASTANA. 4 maýsym. QazAqparat - 1992 jyldyń 4 maýsymynda alǵash ret táýelsiz Qazaqstannyń jańa Memlekettik rámizderi bekitildi.
Bul kún el tarıhynda Memlekettik rámizder kúni retinde máńgi este saqtalady.
Memlekettik tý, Memlekettik eltańba jáne Memlekettik ánuran Qazaqstan Respýblıkasynyń negizgi rámizderi sanalady.
Kógildir tústi Týymyz ben ortasynda shańyraq beınesindegi altyn sáýleli kún ornyqqan Eltańbamyz búkil álemge Qazaqstan Respýblıkasy atalatyn jańa Táýelsiz memleket beınesin pash etti. 1992 jyly sýretshi Sháken Nııazbekov salǵan Memlekettik tý bekitildi. Egemen Qazaqstannyń búgingi Eltańbasy eki tanymal sáýletshi Jandarbek Málibekov pen Shota Ýálıhanovtyń qyrýar eńbeginiń jemisi bolyp tabylady. Sondaı-aq 1992 jyly respýblıkamyz Ánurannyń áni men mátinine konkýrs jarııalandy. Qazaqstannyń tuńǵysh Ánurany ániniń avtorlary - Muqan Tólebaev, Evgenıı Brýsılovskıı men Latıf Hamıdı.
2006 jyly jańa Memlekettik ánuran qabyldandy. Ótken ǵasyrdyń elýinshi jyldarynyń ekinshi jartysynan halyq arasynda keń tanymal bolǵan patrıottyq án «Meniń Qazaqstanym» jańa Ánuran negizine aınaldy. Onyń avtorlary - Shámshi Qaldaıaqov, Jumeken Nájimedenov, Nursultan Nazarbaev.
