Búgin «Qazaqstan» kontsert zalynda QR ІІM Іshki áskerleriniń qurylǵanyna 22 jyl tolýyna baılanysty gala-kontsert ótedi
ASTANA. 10 qańtar. QazAqparat - Búgin Qazaqstan Respýblıkasy ІІM Іshki áskerleriniń qurylǵanyna 22 jyl toldy. Osyǵan baılanysty Іshki ásker ofıtserleri men kelisimshart boıynsha áskerı qyzmet etip júrgenderge, barlyǵy 13 adamǵa Іshki ister mınıstri, general-leıtenant Qalmuhanbet Qasymov pen Іshki áskerler bas qolbasshysy, general-maıor Rýslan Jaqsylyqovtyń buıryqtarymen nagradalar tapsyryldy. Bul týraly "Astana aqshamy" gazeti habarlap otyr.
Basylymnyń jazýynsha, sondaı-aq, Іshki áskerdiń Astana garnızonyna qarasty 6636 jáne 3660 áskerı bólimderiniń jańadan sapqa qosylǵan sarbazdary saltanatty túrde Áskerı ant qabyldady. Áskerge byltyrǵy kúzde shaqyrylyp, jas sarbaz kýrsynan ótken tórt júzge jýyq jaýynger Otanymyz ben halqymyzǵa árqashanda adal bolýǵa sert berip, Іshki ásker quramynyń tolyqqandy sarbazy atandy.
Ant qabyldaý rásiminiń aldynda 3660 áskerı bólim komandıri, polkovnık Marat Árinov quttyqtaý sóz sóıledi. «Áskerı ant - árbir jaýyngerge buzýǵa bolmaıtyn berik, myzǵymas zań. Ol jaýyngerdiń tártipti bolýyn, áskerı jarǵylar men komandırler buıryqtarynyń buljytpaı oryndalýyn talap etedi. Tártipti jaýyngerlik qyzmettiń ózegi, jeńistiń anasy dep beker atamaǵan. Óz boıynda osy qasıetti damytqan áskerı qyzmetshi eshqashan utylmaıdy. Sizder ata-babamyz bilektiń kúshi, naızanyń ushymen qorǵap qalǵan ulan-baıtaq jerimizdiń tynyshtyǵy men turaqtylyǵyn qorǵaýǵa daıyn bolyńyzdar», - dedi ol.
Aıta ketý kerek, atalǵan merekege oraı uıymdastyrylǵan dástúrli gala-kontsert búgin keshki saǵat 19:00-de "Qazaqstan" kontserttik zalynda ótedi. Onda áskerdiń Án-bı ansambli men Ortalyq orkestri óner kórsetedi.
