Búgin - Qazaqstan kenshileriniń kásibı merekesi
«Qurmetti taý-ken óndirý ónerkásibiniń qyzmetkerleri! Qazaqstan Respýblıkasy Indýstrııa jáne ınfraqurylymdyq damý mınıstrliginiń ujymy sizderdi kásibı merekelerińiz – Kenshiler kúnimen shyn júrekten quttyqtaıdy. Kenshi mamandyǵy – otandyq ónerkásiptegi eń kúrdeli ári batyldyqty qajet etetin salalardyń biri, sebebi bul joldy ómirlik isi retinde tańdaǵan adamdar kún saıyn erlik jasaıdy. Osy mamandyq ókilderine arnaıy qurmet kórsetý dástúri búginde túrli elderde turatyn kóptegen jandardy biriktiredi. Kenshilerdiń eńbegi kez kelgen memlekettiń tabysty ekonomıkalyq damýynyń mańyzdy baǵyty bolyp sanalady», - dep jazylǵan mınıstrlik saıtynda.
Mınıstrliktiń habarlaýynsha, Qazaqstan kómir qory jóninde kóshbasshy elderdiń ondyǵyna kiredi. Kómir qorynyń 90% astamy eldiń soltústiginde jáne ortalyq bóliginde shoǵyrlanǵan.
Táýelsizdik jyldary otandyq kómir óndirýshi kásiporyndar 2,6 mlrd tonnadan astam kómir óndirdi, 0,7 mlrd tonnadan astam kómir taıaý jáne alys shetelge eksporttaldy. Búginde respýblıkanyń kómir salasy elektr qýatyn shamamen 70%-yn óndirýdi, koks-hımııa óndirisiniń júz paıyz júktemesin qamtamasyz etedi. Sondaı-aq kommýnaldyq-turmystyq sektor men halyqtyń otynǵa degen qajettiligin tolyq qanaǵattandyrady.
Sonymen birge, elimizde «Qazaqstan Respýblıkasynyń kómir salasyn damytý jónindegi 2019-2021 jyldarǵa arnalǵan Jol kartasy», «2019-2020 jyldar kezeńine arnalǵan kommýnaldyq-turmystyq muqtajdyqtar men halyqqa arnalǵan kómir ónimderine qajettilik jospary» júzege asyrylýda.
«Barlyqtaryńyzǵa osynaý qıyn jumysyńyz úshin rızashylyǵymyzdy bildiremiz. Joǵary kásipqoılyq pen tabandylyqtyń arqasynda kenshiler aldaǵy ýaqytta da el ekonomıkasyn damytýǵa laıyqty úles qosaryna senimdimiz. Búgingi tańda jumys ádisteri jańaryp, jetilip keledi. Biraq eń bastysy — saladaǵy ardagerler urpaqtarynyń dańqty dástúri saqtalýda. Kenshiler kúni – ken óndirý ónerkásibi ardagerlerine alǵys aıtý, kenshiler isine jaýapkershilikpen qaraý, janqııarlyqqa qurmet bildirý merekesi. Kásibı mereke kúni barlyq kenshiler men ardagerlerge myqty densaýlyq, baqyt pen amandyq, kez kelgen bastamalaryńyzǵa tabys pen sáttilik tileımiz!», - deıdi QR IIDM.
