Búgin - Qazaqstan kedenshileriniń kásibı merekesi
ASTANA. 12 jeltoqsan. QazAqparat - Búgin Qazaqstan Respýblıkasynyń keden organdary qurylǵan kún.
QR Prezıdenti N.Nazarbaevtyń 1992 jylǵy 12 jeltoqsandaǵy «Qazaqstan Respýblıkasynyń qarjy, salyq jáne keden qyzmetterin qaıta qurylymdaý týraly» Jarlyǵyna sáıkes, atalǵan barlyq qyzmetter birtutas júıe - Qazaqstan Respýblıkasynyń Qarjy mınıstrligine biriktirildi.
Qazaqstan Respýblıkasynyń keden organdarynyń negizgi mindeti - Qazaqstan Respýblıkasynyń ekonomıkalyq qaýipsizdigin qamtamasyz etý, materıaldyq jáne mádenı qundylyqtardyń elden zańsyz shyǵarylýynyń, qarý-jaraq pen esirtkiniń ákelinýiniń jolyn kesý, kontrabandamen kúres, respýblıka bıýdjetine kedendik bajdardyń aýdarylýyn qamtamasyz etý, Qazaqstan Respýblıkasynyń shekarasy arqyly azamattar men kólikterdiń ótýin uıymdastyrý jáne ózgeleri bolyp tabylady. Mańyzdy mindetterdiń biri, sondaı-aq keden qyzmetiniń bilikti mamandaryn daıarlaý bolyp tabylady.
