Búgin Qazaqstan fýtbolynyń kúni atalyp ótilýde
ASTANA. QazAqparat - Búgin, 25 sáýir kúni elimizde Qazaqstan fýtbolynyń kúni atalyp ótiledi, dep habarlady Fýtbol federatsııasynyń baspasóz qyzmetinen.
«12 jyl buryn dál osy kúni Stokgolmde (Shvetsııa) Qazaqstannyń ulttyq fýtbol qaýymdastyǵy ÝEFA quramyna qabyldandy. 2002 jyldyń 25 sáýirinde Qazaqstan Eýropa fýtbol qaýymdastyǵynyń 52-shi múshesi atandy. ÝEFA-daǵy 12 jyl ishinde Qazaqstan balalar men jasóspirimder, buqaralyq, kásibı fýtbol, ınfraqurylymdy damytý, jattyqtyrýshylar men tóreshi mamandardy daıarlaý salasynda kóptegen oń ózgeristerge qol jetkizdi», - delingen Federatsııanyń habarlamasynda.
Eýropalyq fýtbol qaýymdastyǵy uıymy ÝEFA-nyń kezekti 38-shi Kongresin 2014 jyldyń naýryzynda Astanada ótkizý týraly sheshimi - ÝEFA tarapynan Qazaqstan fýtbolynyń qarqyndy damyp kele jatqanyna berilgen baǵasy.
