Búgin «Qazaqstan barysynyń» palýandary «Han Shatyrda» jankúıerlerimen júzdesedi
ASTANA. QazAqparat - Búgin elordadaǵy «Han Shatyr» saýda oıyn-saýyq ortalyǵynda «Qazaqstan barysy» týrnıriniń aqtyq saıysyna qatysýshylardyń salmaǵyn ólsheý rásimi ótedi. Bul týraly sharany uıymdastyrýshylar habarlaıdy.
«Barlyq jankúıerlerimizdi 27 maýsym kúni saǵat 19:00-de «Han Shatyr» saýda oıyn-saýyq ortalyǵyna shaqyramyz. Bul jerde «Qazaqstan barysy» aqtyq jekpe-jegine qatysýshylardyń salmaǵyn ólsheý rásimi ótkiziledi. Kelińizder, palýandarymyzben júzdesińizder», - delingen habarlamada. Sportshylarmen kezdesýden soń kórermen qaýym «Aldaspan» tobynyń ónerin tamashalaı alady. Aıta keteıik, 2011 jyldan beri ótkizilip kele jatqan ulttyq joba halyqtyń súıikti týrnırlerdiń birine aınaldy. Byltyr dodanyń jeńimpazy bolyp Shyǵys Qazaqstan oblysynyń ókili Aıbek Nuǵymarov atanǵan bolatyn. Bıyl týrnırdiń bas júldesine 28 palýan talasady dep kútilýde.
