Búgin QazAqparat agenttiginiń qurylǵanyna - 102 jyl
1920 jyly alǵashqy qazaq aqparat agenttigi ROSTA-nyń Orynbor-Torǵaı bólimshesi negizinde quryldy. Atalmysh qara shańyraqtyń qazirgi ıesi «QazAqparat» halyqaralyq aqparat agenttigi 2022 jyly «Qazaqstan Respýblıkasy Prezıdentiniń teleradıokesheni» KEAQ quramyna qosylý arqyly qaıta quryldy.
Eske salsaq, 1925 jyly agenttiktiń aty QazROST bolyp ózgerdi. Al 1937 jyly «QazTAG» degen atpen Qazaq KSR Mınıstrler Keńesiniń qaraýyna berildi. Arada 60 jyl ótkende, ıaǵnı, 1997 jylǵy qyrkúıektiń 10-ynda QR Prezıdentiniń №3629 Jarlyǵymen «Qazaq aqparat agenttigi (QazAA)» respýblıkalyq qazynalyq kásiporny bolyp ózgertildi.
2002 jylǵy qarashanyń 8-inde QR Úkimetiniń №1186 qaýlysyna sáıkes QazAAG negizinde «Qazaq aqparat agenttigi» Ulttyq kompanııasy («QazAqparat» UK) quryldy. 2008 jylǵy shildeniń 3-inde agenttik QR Úkimetiniń №668 qaýlysyna sáıkes «Arna Medıa» Ulttyq aqparattyq holdıngi» aktsıonerlik qoǵamynyń quramyna kirdi. Al 2012 jylǵy tamyzdan 2014 jylǵa deıin «Qazaqstan» RTRK» AQ quramynda boldy. 2014 jyldyń qańtarynda «QazAqparat» eldegi alǵashqy halyqaralyq aqparat agenttigi (HAA) mártebesine ıe bolyp, óz tarıhynyń jańa kezeńin bastady. 2020 jyly «QazAqparat» Halyqaralyq aqparat agenttigi» AQ quramyna «QazKontent» AQ qosylyp, qaıta quryldy.
Agenttik ǵasyrdan astam ýaqyt boıy saıasat, ekonomıka, bilim, densaýlyq, sport, mádenıet jáne qoǵam tynys-tirshiligi týraly senimdi ári jedel aqparat kózi retinde bedelin múltiksiz saqtap keledi.
QazAqparat jańalyqtary qazaq, orys, aǵylshyn, qytaı, ózbek tilderinde taratylyp keledi. Sonymen qatar, sheteldegi qandastarymyz úshin jańalyqtar latyn grafıkasynda jáne tóte jazýmen beriledi.
Atap aıtqanda, 2004 jyldyń 14 aqpanynda «QazAqparat» ulttyq kompanııasynyń qazaq bólimshesi Qazaqstanda alǵash ret latyn álipbıi negizinde memlekettik tilde jańalyqtar taratýdy qolǵa aldy. Negiz retinde akademık Ábdýálı Qaıdar daıyndaǵan latyn grafıkasynyń úlgisi alyndy. Keıinnen osy nusqa mamandar arasynda «QazAqparat nusqasy» dep atalyp ketti. Sonyń arqasynda kırıllıtsa qarpin oqı almaıtyn shetelderdegi otandastarymyz tarıhı Otanyndaǵy bolyp jatqan oqıǵalardy bilip otyrýǵa múmkindik aldy.
«QazAqparat» HAA-nyń ortalyq keńsesi Qazaqstannyń astanasy Nur-Sultan qalasynda ornalasqan. Elimizdiń barlyq óńirlerinde aqparat agenttiginiń menshikti tilshileri jumys isteıdi. Agenttiktiń Reseı, Qytaı, Túrkııa, Eýropa, Ázerbaıjan, Ózbekstan, Qyrǵyzstan jáne Iordanııada da menshikti tilshileri bar. Bul elimizde jáne álemde bolyp jatqan jańalyqtardy jedel ári shynaıy taratýǵa múmkindik beredi.
