Búgin Qazaq kınosynyń kúni
ASTANA. 12 qyrkúıek. QazAqparat - Búgin Qazaq kınosynyń kúni. Alǵashqy qazaq kınosy retinde «Amangeldi» fılmi sanalady.
«Lenfılm» stýdııasynda túsirilgen kartına ult batyr Amangeldi Imanov týraly baıandady. Rejısseri - Mark Levın, al Amangeldiniń rólin akter Elýbaı Ómirzaqov oınady. Osylaısha, qazaqtar týraly túsirilgen alǵashqy fılm dúnıege keldi. Qazaq kınosynyń odan arǵy damýy Ekinshi dúnıejúzilik soǵys jyldaryna keldi. «Lenfılm» men «Mosfılm» stýdııalary Almatyda jumys isteı bastady. 1941 jyldyń 12 qyrkúıeginde Almaty qalasynda fılmderdiń túsirilimimen Kórkem jáne derekti fılmder stýdııasy aınalysa bastady. Keıinnen ol «Qazaqfılm» ataýyna ózgertildi.
Qazaqstan kınematografısteri odaǵynyń basshysy Baýyrjan Nógerbekov 2005 jyly bul kúndi (12 qyrkúıek) «Qazaq kınosynyń kúni» dep ataýdy usyndy. Sodan bastap bul data jyl saıyn atap ótilip keledi.
Qazaq kınosynda «Amangeldiden» keıin qazaq halqynyń taǵdyry men bolmysyn beıneleıtin talaı týyndylar dúnıege keldi. Olardyń arasynda «Meniń atym Qoja», «Taqııaly perishte», «Devýshka djıgıt» jáne taǵy basqalary bar. Qazaq kınostýdııasy alǵashqy uıymdasqan kezinen bastap 100-den astam kórkem fılm jáne 500-deı derekti fılm shyǵardy. Ekranǵa qazaq halqynyń ótken ómirin kórsetetin "Abaı áni" (1946), "Shoqan Ýálıhanov" (1957), "Qyz Jibek" (1972), "Sultan Beıbarys" (1989), "Otyrardyń kúıreýi" (1992), "Mahabbat beketi" (1993), "Jambyldyń jastyq shaǵy" (1996), t.b. kartınalar shyqty. Balalarǵa arnalǵan "Qanatty syılyq" (1956), "Meniń atym Qoja" (1963), "Qyzyl tas zastavasy mańynda" (1969), "Kókserek" (1973), "Alpamys mektepke barady" (1976), "Balalyq shaqtyń kermek dámi" (1983), "Súırik" (1984), "Aýylym Alataýdyń baýraıynda" (1985), t.b. sekildi fılmder jaryq kórdi.
