Búgin qarapaıym qazaq otbasylaryn ulyqtaıtyn kún - Darıǵa Nazarbaeva
ASTANA. QazAqparat - Búgin Astanadaǵy "SOS balalar aýylyna" barǵan Parlament Senatynyń Halyqaralyq qatynastar, qorǵanys jəne qaýipsizdik komıtetiniń tóraıymy Darıǵa Nazarbaeva alǵys aıtý kúniniń tereń maǵynasyna úńildi, dep habarlaıdy QazAqparat.
"Búgin bərimiz óte bir qýanyshty, shýaqty sharanyń kýəsi bolyp turmyz. Búgin bir-birimizdi qýantyp, alǵys aıtamyz. Jalpy, ómirde alynbaıtyn qamal joq...Eshqashan keri sheginbeı, muńaımaý kerek. Demeý bolatyn sizderde - biz, bizde - sizder barsyzdar. Jəne bir-birimizdi demep júrgen kezde,eshqandaı qıyndyqtan qoryqpaıyq",-dedi Darıǵa Nazarbaeva balalar aýylynda tərbıe alyp jatqan búldirshinderdi qushaǵyna basa otyryp.
"Búgin bizdiń - óte uly, ulttyq merekemiz. Búgin - alǵys aıtý kúni. Osydan kóp jyldar buryn jer aýyp kelgen qanshama ózge ult ókilderin keń dalamyzdyń baýyryna basqan qarapaıym qazaq otbasylarynyń erligin, esimin eske alatyn, məńgige saqtaıtyn mereke. Ol otbasylar qazaq jerin meken etti, baqytyn tapty. Sondyqtan, kezinde olardy qutqarǵan qazaq otbasylaryna alǵys aıtatyn kún. Prezıdentimiz sondyqtan da osy merekeni bekitti. Men de sizderdi osy alǵys aıtý kúnimen shyn júrekten quttyqtaımyn",-dedi Darıǵa Nazarbaeva.
