Búgin - Halyqaralyq orman kúni
ASTANA. 20 naýryz. QazAqparat - Búgin búkil álemde 1971 jyly bekitilgen Halyqaralyq orman kúni nemese Ormandy qorǵaýdyń dúnıejúzilik kúni atap ótiledi.
Bul kúndi bekitý bastamasyn Eýropalyq aýylsharýashylyq konfederatsııasy 1971 jyly 23-inshi Bas Assambleıada usyndy jáne bul ıdeıany BUU janyndaǵy Dúnıejúzilik azyq-túlik jáne aýylsharýashylyq uıymy qoldady.
Ormandy jáne onyń baılyqtaryn qorǵaý búginde álemniń barsha elderi úshin basty ekologııalyq mindetter qatarynda tur.
Búgingi kúni Jer sharyndaǵy ormandardyń jalpy aýmaǵy 38 mln. sharshy shaqyrymdy quraıdy (bul qurǵaq jerdiń úshten bir bóligi), onyń 13 paıyzy qorǵalatyn tabıǵı aýmaqtarǵa jatady. Aǵashtar - ǵalamsharymyzdyń ókpesi, olar baǵa jetpes ekologııalyq, áleýmettik jáne ekonomıkalyq mańyzǵa ıe - Jerdiń aýasyn qalyptastyrýǵa qatysady, ottegimen qamtamasyz etedi, zııandy qaldyqtardy qaıta óńdeıdi, sý resýrstaryn saqtaıdy, kóptegen ósimdikter men janýarlardyń mekeni bolyp tabylady, adamdardy tamaqpen jáne taza qorshaǵan ortamen qamtamasyz etedi.
Keıbir sarapshylardyń baǵalaýyna sáıkes, sońǵy 10 jylda adam 26 mln. sharshy shaqyrym ormandy joıdy. Onymen qosa aǵashtar órtterden, zańsyz kesip alý áreketterden, tabıǵı apattardan, joıǵysh-jándikterden, aýrýlar men ózge de sebepterden joıylý ústinde.
