Búgin - Halyqaralyq murajaılar kúni
ASTANA. QazAqparat - Búgin - Halyqaralyq murajaılar kúni. Ony Qazaqstan jurtshylyǵy da atap ótedi.
Táýelsizdik jyldary elimizdegi murajaılar sany el basshysynyń syndarly saıasaty men azamattardyń bilim jáne mádenı deńgeıiniń kóterilýiniń arqasynda arta túsken. Atap aıtqanda, 1995 jyly elimizde nebári 87 murajaı bolsa, 2013 jyly olardyń sany 224-ke jetken. Sonymen qatar olarǵa kelýshiler sany da artqan, 1995 jyly ol 2,5 mln. adamdy qurasa, ótken jyly 4,8 mln. jan qundy jádigerlerge qyzyǵýshylyq tanytqan. Statıstıka agenttiginiń málimetterine súıensek, ótken jyly elimiz boıynsha ońtústik óńirdegi murajaılar eń kóp kelýshilerdi qabyldaǵan, ondaǵy týyndylardy tamashalaýshylar sany munda 1 mln. 100 myń adamnan asyp túsken. ShQO mýzeılerine 623 myńnan astam adam barǵan. Al elordadaǵy ǵasyrlardan syr shertetin ǵımarattar tabaldyryǵyn 531 myńnan astam adam attaǵan. Sondaı-aq Mańǵystaý oblysyndaǵy mýzeılerde 57,4 myń jan bolǵan. Al álemdegi tarıhı jáne óner jádigerlerine asa baı ári iri murajaılardyń biri Lývrdy 2012 jyly on mıllıonǵa jýyq jan tamashalaǵan. Aıta keteıik, 18 mamyr kúni álemdegi tarıh jáne óner qundylyqtaryn qurmet tutýshylar Halyqaralyq murajaı kúnin atap ótedi. Bul kúndi aıtýly kún retinde belgileý týraly sheshim 1977 jyly Halyqaralyq murajaılar keńesinde qabyldanǵan edi.
