Búgin - Halyqaralyq medbıkeler kúni
ASTANA. 12 mamyr. QazAqparat - Búgin - Halyqaralyq medbıkeler kúni, dep habarlaıdy QazAqparat.
Bul kúndi halyqaralyq deńgeıde atap ótý bastamasy 1953 jyly kóterilgen bolatyn. Araǵa 12 jyl salyp, Halyqaralyq medbıkeler kúni resmı túrde atalyp ótetin boldy. Al 1974 jyly medbıkelerdiń Halyqaralyq keńesi atalǵan merekeni mamyrdyń 12-si kúni toılaýdy uıǵardy. Sebebi bul kún - medbıkeler qyzmetiniń negizin qalaýshylardyń biri, tanymal Florens Naıtıngeldiń týǵan kúni. Ol XX ǵasyrdyń basynda konservatıvti Anglııanyń medıtsınasyn túbegeıli ózgertip, osy salada medbıkeler qyzmetiniń ashylýyna sebep boldy.
Aıta keteıik, Qazaqstanda medıtsına salasynyń damýyna erekshe kóńil bólinip keledi. Osy salaǵa qatysty bıylǵy jańalyq - elimizde 1 shildeden bastap 225 myń medıtsına qyzmetkeriniń jalaqysy 30 paıyzǵa kóbeıedi. Al búgingi tańda shamamen 70 myń teńge kóleminde aılyq jalaqy alyp kelgen medbıkelerdiń jalaqysy 1 shildeden bastap 100 myń teńgege jetetin bolady.
