Búgin Halyqaralyq KVN kúni
ASTANA. 8 qarasha. QazAqparat - 2001 jyldyń 8 qarashasynda Reseı men TMD-nyń keıbir memleketteri tarıhta alǵash ret Halyqaralyq Kóńildi jáne tapqyrlar klýby (KTK) kúnin atap ótti.
Mereke ıdeıasyn Halyqaralyq KTK klýbynyń prezıdenti Aleksandr Maslıakov usyndy. Merekeleý datasy Kóńildi jáne tapqyrlar klýby oıynynyń efırge alǵash shyqqan 1961 jyldyń 8 qarashasynan alyndy.
Byltyr KVN 50 jyldyq mereıtoıyn atap ótti. KVN-niń alǵashqy júrgizýshileri Elem Klımov, Aleksandr Belıavskıı jáne Natalıa Fateeva boldy. Keıin olardy Albert Akselrod pen Svetlana Jıltsovanyń dýeti almastyrdy. 1964 jyly Akselrodtyń ornyna Aleksandr Maslıakov kelip, ol KVN-niń negizgi júrgizýshisi ári klýb basshysyna aınaldy.
1971 jyldyń sońyna qaraı KSRO Ortalyq televızııasy basshylyǵymen bolǵan kıkiljiń saldarynan baǵdarlama biraz ýaqytqa jabyldy. KVN tek 1986 jyly qaıta túledi.
Qazaqstan KVN-y kósh keıin damyǵanymen, qazir elimizde orys tildi KVN-men qatar, tól tilimizdegi Kóńildi jáne tapqyrlar klýbtary bar. «Qazaqstan KVN odaǵynyń» prezıdenti - Esen Eleýken. Qazaqsha KVN elimizdegi talantty jastardy sahnaǵa shyǵardy. Olardyń eń belsendi ári daryndy qatysýshylary búginde mádenıette, shoý-bızneste jáne basqa da salalarda óz oryndaryn tabý ústinde.
